ஐ.ஐ.டி. மெட்ராஸ் இணையதளம் முடக்கம்.. தொடரும் ஹேக்கர்களின் அட்டகாசம்
சென்னை ஐ.ஐ.டி.மெட்ராஸ் இணையதளத்தை மர்மநபர்கள் முடக்கியுள்ளனர்.
சென்னை: சென்னை ஐஐடி இணையதளத்தில் மர்மநபர்கள் ஊடுருவினர். இதுகுறி்தது சைபர் கிரைம் போலீசார் விசாரணை நடத்தி வருகின்றனர்.
சென்னை ஐ.ஐ.டி. மெட்ராசின் பல்வேறு இணையதளங்களை ஹேக்கர்கள் முடக்கியுள்ளனர். முதன்மை இணையதளமான IIT-M (https://www.iitm.ac.in/) முடக்கப்படவில்லை. ஆனால் 6 துறை சார்ந்த இணையதளங்கள், 5 இணையதளங்கள் ஹேக் செய்யப்பட்டுள்ளன.
இதில் http://www.cce.iitm.ac.in, https://saif.iitm.ac.in மற்றும் https://biotech.iitm.ac.in ஆகிய இணையதளங்கள் ஹேக் செய்யப்பட்ட பட்டியலில் உள்ளடங்கும். பல்கலைக்கழக இணையதளங்களை ஏராளமான மாணவர்களும், ஆசிரியர்களும் பயன்படுத்தி வருகின்றனர்.
வரும் ஜனவரி 4 முதல் 8 ஆம் தேதி வரை, ஐஐடி மெட்ராசின் ஆண்டுவிழா நிகழ்ச்சிகள் நடைபெற உள்ளன. இதுதொடர்பான தகவல்கள் மாற்றப்பட்டுள்ளதாகவும், அதனை மீண்டும் சரி செய்யும் பணியில் ஈடுபட்டுள்ளதாகவும் ஐஐடி இயக்குநர் பாஸ்கர் ராமமூர்த்தி கூறியுள்ளார்.
கொச்சி மற்றும் திருவனந்தபுரம் விமான நிலையங்களின் பெயரிலான அதிகாரப்பூர்வமற்ற இணையதளங்களை பாகிஸ்தானிய ஹேக்கர்கள் நேற்று ஹேக் செய்திருந்தது குறிப்பிடத்தக்கது.