போயஸ் கார்டன், கோடநாடு எஸ்டேட், விவேக் வீட்டில் இன்று 4வது நாளாக ஐடி ரெய்டு
சென்னை: சசிகலாவின் உறவினர்களின் வீடுகள், போயஸ் கார்டனில் உள்ள பழைய ஜெயா டிவி அலுவலகம், ஜெயா டிவி சிஇஓ விவேக்கின் வீடு உள்ளிட்ட பல இடங்களில் இன்று 4வது நாளாக வருமான வரித்துறையினர் சோதனை நடத்தி வருகின்றனர்.
சசிகலாவின் உறவினர்களின் வீடுகள், அலுவலகங்கள், கல்லூரிகள், ஜெயா டிவி அலுவலகம், கோடநாடு எஸ்டேட் என மொத்தம் 186 இடங்களில் கடந்த வியாழக்கிழமை காலை வருமான வரித்துறையினர் சோதனை நடத்தினர்.
இதில் போயஸ் கார்டனில் உள்ள பழைய ஜெயா டிவி அலுவலகம், ஜெயா டிவி சிஇஓ விவேக்கின் வீடு, கோடநாடு எஸ்டேட் உள்ளிட்ட பல்வேறு இடங்களில் 4வது நாளாக இன்றும் வருமான வரித்துறையினர் சோதனை நடத்தி வருகின்றனர்.
பெரம்பூரில் உள்ள கே.எல்.பி. கட்டுமான நிறுவனத்திலும் 4வது நாளாக வருமான வரித்துறையினர் சோதனை நடத்தி வருகிறார்கள். போலி நிறுவனங்களுக்கான ஆவணங்கள் விவேக் வீட்டில் இருந்து பறிமுதல் செய்யப்பட்டதாக செய்திகள் வெளியாகியுள்ளன. டிடிவி தினகரனின் வீட்டில் சோதனை முடிந்துவிட்டது.
தினகரனின் பண்ணை வீட்டில் இருந்து ஏராளமான முக்கிய ஆவணங்கள் பறிமுதல் செய்யப்பட்டதாக தகவல் வெளியாகியுள்ளது.