அரசியல் "அரங்கேற்றம்" குறித்து விரைவில் பிரஸ்மீட் - கமல்ஹாசன் தகவல்
சென்னை: அரசியல் பிரவேசம் குறித்து தனியா பிரஸ் மீட் வைக்கிறேன் என்று நடிகர் கமல்ஹாசன் கூறியுள்ளார்.
கமல்ஹாசன் ஒவ்வொரு அசைவும், மொழியும் மக்களால் கவனிக்கப்படுகிறது. மாலை வந்து விட்டால் கமல் டிவிட்டர்ல என்ன போட்டிருக்கிறார் என்று மக்கள் எதிர்பார்க்க ஆரம்பித்து விடுகிறார்கள். பிறகு இரவெல்லாம் அதுவே பேச்சாகி பொழுது விடிந்து விடுகிறது.
அவர் அரசியலுக்கு வருவாரா இல்லையா என்ற விவாதம் ஒரு பக்கம் சூடு பிடித்துள்ளது. இந்த நிலையில் நேற்று மாலையில் சென்னையில் நடந்த தமிழ் தலைவாஸ் புரோ கபாடி அணி சீருடை அறிமுக விழாவில் கமல்ஹாசன் கலந்து கொண்டார். அவரது பேச்சுதான் அனைவரின் எதிர்பார்ப்பாகவும் இருந்தது. நினைத்தது போலவே, ஒருவையில் பேசுவோருக்கு மத்தியில் தலைவாஸ் என்று பெயர் வைத்தது சிறப்பு என்று கூறி அரசியலை தொட்டுச் செல்ல கமல் தவறவில்லை.
நிகழ்ச்சிக்குப் பின்னர் டிடிநெக்ஸ்ட் செய்தியாளருக்கு கமல் அளித்த ஒரு பேட்டியின்போது அரசியல் பிரவேசம் குறித்து கேட்டபோது, அதைப் பற்றிப் பேச இது இடமல்ல, நேரமல்ல. அதுகுறித்து விரைவில் தனியாக பிரஸ் மீட் வைப்போம் என்று கூறிச் சென்றார்.
இந்த பேச்சு இப்போது புதிய பரபரப்பைக் கிளப்பியுள்ளது. இன்று மாலை டிவிட்டரில் என்ன வரப் போகிறதோ என்ற எதிர்பார்ப்பும் பல மடங்கு அதிகரித்துள்ளது.