எம்.பி.பி.எஸ், பி.டி.எஸ் தரவரிசை ஜூன்12ல் வெளியீடு; 18ல் கவுன்சிலிங்
சென்னை: எம்.பி.பி.எஸ், பி.டி.எஸ் போன்ற மருத்துவ படிப்புக்கான தரவரிசை பட்டியல் வரும் 12ஆம் தேதி வெளியிடப்படும் என்று அறிவிக்கப்பட்டுள்ளது.
இதுகுறித்து மருத்துவ கல்வி இயக்குநர் கீதாலெட்சுமி செய்தியாளர்களிடம் பேசியதாவது:
தமிழகத்தில் எம்.பி.பி.எஸ்., பி.டி.எஸ்.படிப்பில் சேருவதற்கான விண்ணப்பங்களை மாணவர்கள் சமர்ப்பிக்க இன்று கடைசி நாளாகும்.
சென்னையில் இன்று செய்தியாளர்களிடம் பேசியபோது இவ்வாறு கூறிய அவர், மாணவர்களின் ரேண்டம் எண் 9ஆம் தேதி வெளியிடப்படும் என்றார்.
முதல் கட்ட கலந்தாய்வை 18ஆம் தேதி முதல் 25ஆம் தேதிக்குள் முடிக்க திட்டமிட்டுள்ளோம் என்றும், 2ஆம் கட்ட கலந்தாய்வு ஜூலை 27ஆம் தேதிக்குள்ளும், 3ஆம் கட்ட கலந்தாய்வு ஆகஸ்ட் 6ஆம் தேதி முதல் 10ஆம் தேதிக்குள்ளும் முடிக்க திட்டமிட்டுள்ளதாகவும் கீதாலெட்சுமி தெரிவித்தார்.
மருத்துவ படிப்புக்கு நேற்று வரை 30,380 விண்ணப்பங்கள் விற்பனையாகியுள்ளன. இதுவரை மொத்தம் 22 ஆயிரத்து 622 மாணவர்கள் விண்ணப்பங்களைச் சமர்பித்துள்ளனர். பூர்த்தி செய்த விண்ணப்பம், சென்னை கீழ்ப்பாக்கம் மருத்துவக் கல்வி தேர்வுக் குழுவுக்கு வந்து சேர இன்று கடைசி நாளாகும் என்று கூறினார்.