புதுவையில் எந்த கட்சிக்கும் பெரும்பான்மை கிடைக்காது - நியூஸ் 7 கருத்துக்கணிப்பு
சென்னை: புதுச்சேரி மாநிலத்தில் எந்த கட்சிக்கும் பெரும்பான்மை கிடைக்க வாய்ப்பு இல்லை என நியூஸ் -7 தினமலர் கருத்துக்கணிப்பு முடிவுகள் கூறுகின்றது.
நியூஸ் 7 தொலைக்காட்சியும், தினமலர் நாளிதழும் இணைந்து நடத்திய கருத்துக் கணிப்புகளை மண்டல வாரியாக வெளியிட்டு வருகிறது. தமிழகத்தில் உள்ள 234 தொகுதிகளின் முடிவுகள் நேற்று வெளியிடப்பட்டன.
அதில் திமுக கூட்டணிக்கு 141, அதிமுக கூட்டணிக்கு 87, பாமக 2, தேமுதிக - மநகூ 1, பாஜக - 1 தொகுதிகளில் வெல்லும் வாய்ப்புள்ளதாகவும், இரண்டு தொகுதிகளில் திமுக, அதிமுகவுக்கு சம வாய்ப்புள்ளதாகவும் தெரிவிக்கப்பட்டுள்ளது.
இந்நிலையில் இன்று புதுச்சேரி மாநில கருத்துக்கணிப்பு முடிவுகளை வெளியிட்டது நியூஸ் 7 - தினமலர் நிறுவனம். அதில் புதுச்சேரி மாநிலத்தில் மொத்தம் உள்ள 30 தொகுதிகளில் மாஹே, ஏனாம் தவிர மீதமுள்ள 28 தொகுதிகளின் கருத்துக்கணிப்பை வெளியிட்டுள்ளது நியூஸ் -7 தினமலர்.
இக் கருத்துக்கணிப்பின் படி காங்கிரஸ் + திமுக கூட்டணிக்கு 12 தொகுதிகளிலும், ஆளும் என்.ஆர்.காங்கிரஸ் கட்சிக்கு 12 தொகுதிகளிலும் வெற்றி வாய்ப்புள்ளதாக கூறப்பட்டுள்ளது. அதேசமயம் தனித்துப் போட்டியிடும் அதிமுகவுக்கு 3 இடங்கள் வரை கிடைக்க வாய்ப்புள்ளதாக தெரிவிக்கப்பட்டுள்ளது.
மண்ணாடிப்பட்டு தொகுதியில் என்.ஆர்.காங்கிரஸ் கட்சிக்கும் காங்கிரஸ் கூட்டணிக்கும் சமநிலை நிலவுகிறது. இங்கு என்.ஆர்.காங்கிரஸ் கட்சிக்கு 34. சதவீத ஆதரவு கிடைத்துள்ளது. அதேபோல் காங்கிரஸ் + திமுக கூட்டணிக்கும் 34 சதவீத ஆதரவு காணப்படுகிறது. அதிமுகவுக்கு 8.2 சதவீத ஆதரவு கிடைத்துள்ளது.