ரஜினிகாந்த் கட்சியுடன் பாமக கூட்டணி... தினகரனின் அமமுகவுக்கு இப்பவே நோ- தமிழருவி மணியன்
சென்னை: நடிகர் ரஜினிகாந்த் தொடங்கும் கட்சியுடன் பாமக கூட்டணி அமைக்கும் என்று காந்திய மக்கள் இயக்கத் தலைவர் தமிழருவி மணியன் தெரிவித்துள்ளார்.
நடிகர் ரஜினிகாந்தின் ஆலோசகர்களில் ஒருவராக உள்ளார் தமிழருவி மணியன். ரஜினிகாந்த் ஏப்ரல் மாதம் கட்சி தொடங்குவார் என்று கூறியுள்ள தமிழருவி மணியன், ரஜினி தலைமையிலான கூட்டணியில் பல்வேறு கட்சிகளை இணைப்பது குறித்து பேச்சுவார்த்தையையும் நடத்தி வருகிறார்.
இது தொடர்பாக இந்தியன் எக்ஸ்பிரஸ் நாளேட்டுக்கு தமிழருவி மணியன் அளித்த பேட்டியில், பாஜக தலைமையிலான தேசிய ஜனநாயகக் கூட்டணி மற்றும் அதிமுக அணியில் இருக்கும் பாமக, ரஜினிகாந்த் கட்சியுடன் கூட்டணி அமைக்கும். இதர கட்சிகளும் ரஜினிகாந்த் தலைமையிலான கூட்டணியில் இணைய காத்திருக்கின்றன.
"நீட் திணிங்க, CAA மூலம் மக்களை பிரிங்க, தேவை கமிஷன்" இதான் அதிமுக.. பாஜக கோர முகம்.. உதயநிதி சுளீர்
2014-ல் பாமக, தேமுதிக, மதிமுக உள்ளிட்ட கட்சிகளை தேசிய ஜனநாயக கூட்டணிக்காக இணைத்தது போல் தற்போதும் ரஜினிக்காக ஒரு வானவில் கூட்டணி உருவாக்கப்படும். பாஜகவுடன் ரஜினிகாந்த் கூட்டணி அமைப்பாரா? இல்லையா என்பது பற்றி தெரிவிக்க முடியாது.
அதே நேரத்தில் டிடிவி தினகரனுடன் கூட்டணி வைக்கக் கூடாது என்பதில் ரஜினிகாந்த் உறுதியாக இருக்கிறார். தினகரனுடன் கூட்டணி அமைத்தால் எதிர்மறையான விளைவுகள் ஏற்படும் என ரஜினிகாந்த் கருதுகிறார் என தெரிவித்துள்ளார்.