'காபி வித் டிடி'- விளக்குக: கோவை கல்லூரி தேர்வில் பலே கேள்வி
சென்னை: கோவையில் உள்ள கல்லூரி ஒன்றில் தேர்வில் காபி வித் டிடி நிகழ்ச்சி பற்றி கேள்வி கேட்கப்பட்டுள்ளது.
திவ்யதர்ஷினி என்ற டிடியை பற்றி நாங்கள் கூறி உங்களுக்கு தெரிய வேண்டிய அவசியம் இல்லை. டிடி என்றாலே அவர் மூச்சுவிடாமல் பேசுவது தான் அனைவரின் நினைவுக்கும் வரும். இந்நிலையில் கோவையில் உள்ள கல்லூரி ஒன்றில் எலக்ட்ரானிக் மீடியா பற்றி படிக்கும் முதுகலை பட்டதாரிகளுக்கு தேர்வு நடந்துள்ளது. அந்த தேர்வில் அளிக்கப்பட்ட வினாத்தாளில் காபி வித் டிடி நிகழ்ச்சி பற்றி விளக்குமாறு ஒரு கேள்வி இருந்துள்ளது.
இந்த கேள்வி விஷயம் இணையதளத்தில் தீயாக பரவியுள்ளது. இது குறித்து அறிந்த டிடியோ அடடா கல்லூரி தேர்வில் என்னை பற்றி கேள்வி கேட்டுள்ளார்களா என்று நெகிழ்ந்துவிட்டார்.
இது குறித்து டிடி கூறுகையில்,
நானும் ஒரு காலத்தில் கல்லூரியில் லெக்சரராக இருந்தவள் தான். காபி வித் டிடி நிகழ்ச்சி இவ்வளவு பிரபலமாகியுள்ளதை நினைத்து மகிழ்ச்சியாக உள்ளது. தேர்வில் என் நிகழ்ச்சி பற்றி கேள்வி கேட்ட அந்த கல்லூரிக்கு செல்ல விரும்புகிறேன். என் நிகழ்ச்சி பற்றி விடை எழுதிய மாணவர்களை சந்திக்க விரும்புகிறேன் என்றார்.