1996-க்குப் பிறகும் அரசியலில் ரஜினியின் தாக்கம் உள்ளது! - பாஜக (அப்படியா?)
சென்னை: 1996-க்குப் பிறகு ரஜினி பேச்சு எடுபடவில்லை என்று கூறுவது தவறு. அரசியலில் அவரது தாக்கம் இப்போதும் உள்ளது என்று வானதி சீனிவாசன் தெரிவித்தார்.
தமிழக பாஜ பொது செயலாளர் வானதி சீனிவாசன் நேற்று மாலை அளித்த பேட்டியில், "பாஜக பிரதமர் வேட்பாளர் மோடி, சூப்பர் ஸ்டார் ரஜினிகாந்தை சில தினங்களுக்கு முன்னர் சந்தித்துப் பேசினார்.
அதைத் தொடர்ந்து மோடி ஒரு திறமையான தலைவர், அவர் மனதில் என்ன நினைக்கிறாரோ அந்த காரியம் வெற்றி அடைய எனது வாழ்த்துக்கள் என்று ரஜினிகாந்த் தெரிவித்தார். ரஜினியின் இந்த கருத்து அரசியலில் நிச்சயம் தாக்கத்தை ஏற்படுத்தும்.
நரேந்திர மோடி பற்றி தன் மனதிலிருந்து கருத்துகளை அவர் ஒளிவு மறைவின்றி பிரதிபலித்துள்ளார்.
1996ம் ஆண்டுக்கு பிறகு ரஜினியின் பேச்சு மக்கள் மனதில் எடுபடவில்லை என்று கூறுவதை ஏற்க முடியாது. அரசியலில் ரஜினியின் தாக்கம் இருந்து கொண்டுதான் இருக்கிறது. ரஜினியின் பேச்சை மக்கள் கேட்கத்தான் செய்கிறார்கள்," என்றார்.