சதம் அடித்த சின்ன வெங்காயம் விலை.. உரிக்காமலே கண்ணீர் விடும் தாய்க்குலங்கள்
சின்ன வெங்காயத்தின் விலை ரூ.100...தாய்மார்களே தீபாவளி வரை விலை குறைய வாய்ப்பே இல்லையாம்!
சென்னை: சின்ன வெங்காயத்தின் விலை ரூ.100-க்கு விற்கப்படுவதால் தீபாவளி பண்டிகை வரை குறைய வாய்ப்பில்லை என்று கூறப்படுகிறது.
சாம்பார் கமகமக்க காரணமாக இருப்பது சாம்பார் வெங்காயமாகும். இதன் விலை கடந்த சில மாதங்களுக்கு முன்பு கிலோ ஒன்றுக்கு ரூ.125 வரை விற்கப்பட்டு வந்தது. கடந்த 2 ஆண்டுகளாக பருவமழை பொய்த்ததால் நிலவும் தண்ணீர் பற்றாக்குறையால் சின்னவெங்காயம் பயிரிடுவதும் குறைந்தது.
இதனால் கடந்த 2 மாதங்களுக்கு முன்பு கிலோ ரூ.40 வரை விற்பனையான சின்ன வெங்காயத்தின் விலை படிப்படியாக உயர்ந்து வந்தது.
கடந்த சில நாட்களாக முதல்தர சின்ன வெங்காயம் கிலோ ரூ.100-க்கு விற்பனையாகிறது. இதற்கு அடுத்த தர சின்ன வெங்காயம் ரூ.90, ரூ.80, ரூ.70 என்ற விலைகளில் விற்கப்படுகிறது.
அதேவேளை கர்நாடகா, ஆந்திரா, மும்பையில் இருந்து பல்லாரி வெங்காயம் வரத்து உள்ளது. இதன் காரணமாக இதன் விலை சராசரியாக கிலோ ரூ.25 முதல் ரூ.30 வரை விற்பனையாகிறது.
கடந்த மாதம் வரை பல்லாரி கிலோ ரூ.18 முதல் ரூ.20 வரை விற்கப்பட்டது. சின்னவெங்காயம் விலை உயர்வால் பல்லாரி வரத்து அதிகரித்துள்ளது. வியாபாரிகள் கூறுகையில், சின்ன வெங்காயம் வரத்து குறைவாக இருப்பதால், தீபாவளியை தொடர்ந்து மேலும் இருவாரங்களுக்கு இந்த விலையிலேயே விற்பனையாக வாய்ப்புள்ளது என்றனர்.