செல்போனை சார்ஜில் போட்டுக் கொண்டே இனி பேச வேண்டாம் - .ஸ்டாலின் வேண்டுகோள்

சென்னை: செல்போனை சார்ஜில் போட்டுக் கொண்டே இனி யாரும் தயவு செய்து பேச வேண்டாம் என்று அனைவரையும் அன்புடன் கேட்டு கொள்வதாக திமுக பொருளாளர் மு.க.ஸ்டாலின் தெரிவித்துள்ளார்.

சென்னையை அடுத்த மதுராந்தகம் செய்யூர் பகுதியை சேர்ந்த கூலித் தொழிலாளி எட்டியப்பன் (40). இவரது மனைவி வெண்ணிலா. இந்த தம்பதிகளுக்கு 5 குழந்தைகள் உள்ளன. அவர்களில் 3-வது மகன் தனுஷ் (9). 4-ம் வகுப்பு படித்து வரும் தனுஷ், கடந்த சில தினங்களுக்கு முன் சார்ஜரில் இருந்த செல்போனில் பேசியுள்ளார்.

மின் இணைப்பை துண்டிக்காமல் செல்போனை இயக்கி அவர் பேசியிருக்கிறார். அப்போது எதிர்பாராதவிதமாக செல்போன் வெடித்து சிதறியது. இதில் சிறுவனின் வலது கை மற்றும் 2 கண்களில் காயம் ஏற்பட்டது. சத்தம் கேட்டு சமையலறையில் இருந்து ஓடிவந்த வெண்ணிலா அதிர்ச்சியடைந்தார். உடனடியாக சிறுவன் சிகிச்சைக்காக செங்கல்பட்டு மருத்துவமனைக்கு கொண்டு செல்லப்பட்டான்.

பின்னர் மேல் சிகிச்சைக்காக சென்னை கொண்டு வரப்பட்ட சிறுவனுக்கு, வலது கையில் ஏற்பட்ட தீக்காயத்துக்கு கீழ்ப்பாக்கம் மருத்துவமனையில் சிகிச்சை அளிக்கப்பட்டது. சிறுவனின் 2 கண்களிலும் பலத்த காயம் ஏற்பட்டதால் டாக்டர்களின் பரிந்துரைப்படி தனுஷ் எழும்பூர் அரசு கண் மருத்துவமனையில் சேர்க்கப்பட்டான். தொடர்ந்து அவனுக்கு அங்கு சிகிச்சை அளிக்கப்பட்டு வருகிறது.

இந்த நிலையில் அந்த சிறுவனனை திமுக பொருளாளர் மு.க.ஸ்டாலின் இன்று சந்தித்து நலன் விசாரித்தார். சிறுவனை சந்தித்த பின்னர் தனது பேஸ்புக் பக்கத்தில் அவர் கூறியிருப்பதாவது,

செல்போனை சார்ஜ் செய்து கொண்டே பேசியபோது அந்த செல்போன் வெடித்ததில் 9 வயது சிறுவன தனுஷ் தன் கண் பார்வையை இழந்து படு காயமுற்ற சம்பவம் என் மனதை உலுக்கி விட்டது. எழும்பூர் மருத்துவமனையில் சிகிச்சை பெற்று வரும் அச்சிறுவனை சந்தித்து நலம் விசாரித்து, பெற்றோருக்கும் ஆறுதல் கூறினேன். கண் பார்வை பாதிப்புக்குள்ளான அச்சிறுவனை பார்த்து வேதனை அடைந்தேன்.

இதுபோன்ற எதிர்பாராத அசம்பாவிதங்கள் நடைபெறாமல் இருக்க செல்போனை சார்ஜில் போட்டுக் கொண்டே இனி யாரும் தயவு செய்து பேச வேண்டாம் என்று அனைவரையும் அன்புடன் கேட்டு கொள்வதாக தெரிவித்துள்ளார்.

English summary

M.K.stalin meets nine year old chennai boy burns as mobile on charge explodes