கேரளாவைப் போல் கேளிக்கை வரியை ரத்து செய்ய சட்டசபையில் ஸ்டாலின் வலியுறுத்தல்
கேரள மாநில அரசு செய்தது போன்று தமிழக அரசும் கேளிக்கை வரியை ரத்து செய்ய வேண்டும் என்று மு.க. ஸ்டாலின் கோரியுள்ளார்.
சென்னை: கேரள மாநிலத்தை போல் தமிழகத்தில் கேளிக்கை வரியை ரத்து செய்ய மு.க.ஸ்டாலின் வலியுறுத்தியுள்ளார்.
இந்தியாவில் ஜிஎஸ்டி கடந்த 1ம் தேதி முதல் அமலுக்கு வந்தது. அதன்படி சினிமா துறைக்கு 28 சதவீத ஜிஎஸ்டி விதிக்கப்பட்டுள்ளது. இத்துடன் தமிழக அரசு விதிக்கும் கேளிக்கை வரி 30 சதவிதம் சேர்த்து 58 சதவீதமாக வரி விதிப்பு இருப்பதால் திரையரங்குகள் மூடப்பட்டு வேலைநிறுத்தம் நடைபெற்று வருகிறது.
இந்நிலையில், சட்டசபையில் இந்தப் பிரச்சனை குறித்து நேரமில்லா நேரத்தில் எதிர்க்கட்சித் தலைவர் மு.க. ஸ்டாலின் பேசினார். அப்போது, கேரளாவில் உள்ளது போன்று தமிழகத்திலும் கேளிக்கை வரியை ரத்து செய்ய வேண்டும் என்று கோரினார்.
அதே போன்று மேற்கு வங்கத்தில் மக்கள் பயன்பெறும் வகையில் சினிமா டிக்கெட் கட்டணம் குறைக்கப்பட்டுள்ளது என்பதையும் ஸ்டாலின் சட்டசபையில் குறிப்பிட்டார்.
இதற்கு பதில் அளித்த அமைச்சர் எஸ்.பி வேலுமணி, தமிழகத்தில் இரட்டை வரி இல்லை என்றும் கேளிக்கை வரி ஏற்கனவே உள்ளது என்றும் கூறியுள்ளார்.