Just In

அரசியலில் வெற்றி பெறும் ரகசியத்தை கேட்டால் என் கூடவா என அழைக்கிறார் கமல்ஹாசன்: நடிகர் ரஜினிகாந்த்

அரசியலில் வெற்றி பெறும் ரகசியத்தை கேட்டால் தம்முடன் வாருங்கள் என கமல்ஹாசன் கூறுவதாக நடிகர் ரஜினிகாந்த் பேசியது பரபரப்பை ஏற்படுத்தியது.

By Mathi

Updated: Sunday, October 1, 2017, 18:51 [IST]

சென்னை: அரசியலில் வெற்றி பெறும் ரகசியத்தை கேட்டால் "என் கூட வா" என அழைக்கிறார் கமல்ஹாசன் என நடிகர் ரஜினிகாந்த் பேசியது பரபரப்பை ஏற்படுத்தியுள்ளது.

சென்னை அடையாறில் நடிகர் திலகம் சிவாஜி கணேசன் மணி மண்டபம் திறப்பு விழா இன்று நடைபெற்றது. இந்நிகழ்ச்சியில் நடிகர் ரஜினிகாந்த் பேசியதாவது:

சிவாஜி எனும் மகானுடன் பழகியிருக்கிறோம் என்பது நமக்கெல்லாம் பெருமை. தற்போது நடைபெறுவது அரசியல், சினிமா துறை கலந்த ஒரு விழா.

அரசியலிலும் பாடம்

சினிமாவில் மட்டுமல்ல அரசியலிலும் பாடத்தை சொல்லிவிட்டு சென்றிருக்கிறார் சிவாஜி கணேசன். தனிக்கட்சி தொடங்கிய சிவாஜிகணேசன் சொந்த தொகுதியிலேயே தோற்றுப் போய்விட்டார்.

புகழ் மட்டும் போதாது

அது சிவாஜிகணேசனுக்கு அவமானம் அல்ல. அந்த தொகுதி மக்களுக்கு நிகழ்ந்த அவமானம் அது. அரசியலில் வெற்றி பெற சினிமா பெயர் புகழ் மட்டும் இருந்தா போதாது...அதற்கு மேலே ஏதோ ஒன்னு இருக்கனும் என்கிற செய்தியை சொல்லிவிட்டு சென்றிருக்கிறார் சிவாஜி கணேசன்.

எனக்கு தெரியாது

அது மக்களுக்கு மட்டும்தான் தெரியும். எனக்கு சத்தியமாக அது தெரியாது. நடிகர் கமல்ஹாசனுக்கு அது தெரியும்னு நினைக்கிறேன்.

கூட வா சொல்கிறேன்

கமல்ஹாசனுக்கு தெரிந்திருந்தாலும் எனக்கு சொல்ல மாட்டார். ஒருவேளை இரண்டு மாதத்துக்கு முன்னால் கேட்டிருந்தால் சொல்லியிருப்பாரோ என்னவோ? திரையுலகில் மூத்த அண்ணன்..நீங்க .. எங்ககிட்ட சொல்லனும்னு.. சொல்லுங்க நான் உங்க தம்பி அப்படி என்று சொன்னால் "கூட வா" சொல்றேன் என்கிறார் கமல்ஹாசன்.