இன்டஸ்ட்ரியல் ரெவலூசன், இது அசரா புலி.. வாட்ஸ்-அப்பில் வைரலாகும் அமைச்சர் vs டி.ராஜேந்தர் பேச்சு!
சென்னை: தொழில்துறை அமைச்சர் தங்கமணி, முதல்வர் ஜெயலலிதாவை புகழ்ந்து அரைகுறை ஆங்கிலத்தில் புகழ்ந்து தள்ளியதையும், புலி பட பாடல் வெளியீட்டு விழாவில், டி.ராஜேந்தர் நடிகர் விஜயை புகழ்ந்து தள்ளியதையும் ஒப்பிட்டு வாட்ஸ்-அப்பில் வயிறு குலுங்க செய்யும் ஒரு வீடியோ சுற்றி வருகிறது.
சென்னையில் நடந்து முடிந்த சர்வதேச முதலீட்டாளர் மாநாட்டு, நிறைவு நாள் நிகழ்ச்சியில், தமிழக தொழில்துறை அமைச்சர் தங்கமணி, உரையாற்றினார். அப்போது வழக்கம்போல, பெரும்பகுதி ஜெயலலிதாவை பாராட்டுவதில் குறியாக இருந்தார். ஆனால், சர்வதேச முதலீட்டாளர்களுக்கும் புரிய வேண்டும் என்பதற்காக, ஆங்கிலத்தில் அடுக்குமொழி குறிப்பெடுத்து வந்து பேசினார். இதை கேட்டு ஜெயலலிதாவும் சிரித்துக்கொண்டே இருந்தார்.
ஜெயலலிதா ஆட்சி பற்றி குறிப்பிட்ட, தங்கமணி, இன்டஸ்டிரியல் ரெவலூசன், சர்ப்ளஸ் பவர் ஜெனரேசன்,
கன்ட்ரோலிங் இன்ப்ளேசன், ஏபிள் அட்மினிஷ்ட்ரேசன், எம்ப்ளாய்ன்ட் ஜெனரேசன் என்றெல்லாம், ஆங்கில அடுக்குமொழியில் அம்மாவை புகழ்ந்தார். ஆனால், அவரது ஆங்கில உச்சரிப்பை கேலி செய்து வாட்ஸ்-அப்பில் அந்த வீடியோ பலரால் பகிரப்பட்டு வருகிறது.
இந்நிலையில், தங்கமணி பேச்சை மட்டுமின்றி, புலி பட விழாவில் அட்டகாச புலி, அசத்தல் புலி என டி.ராஜேந்தர் புலியை வரிசைப்படுத்திய வீடியோவையும் இணைந்து ஒரு வீடியோ உருவாக்கி பரவிவருகிறது. செம சிரிப்பை வரவழைக்கும் இந்த வீடியோ தற்போது வைரலாக பரவிவருகிறது.