குடியரசு தின விழா ஒத்திகை: மெரீனா சாலையில் 3 நாள் போக்குவரத்து மாற்றம்
சென்னை: குடியரசு தின விழா ஒத்திகையை முன்னிட்டு, சென்னை மெரீனா கடற்கரை சாலையில் 3 நாள்கள் போக்குவரத்து மாற்றம் செய்யப்படுகிறது.
இதுகுறித்து சென்னை பெருநகரக் காவல் துறை வெளியிட்டுள்ள செய்திக் குறிப்பு:
குடியரசு தின விழா கொண்டாட்டம் இம்மாதம் 26-ஆம் தேதி திங்கட்கிழமை காமராஜர் சாலையில் காந்தி சிலை அருகில் கொண்டாடப்படுகிறது. இதையொட்டி, 26-ஆம் தேதியும், இம் மாதம் 22, 24-ஆம் தேதிகளிலும் மெரீனா பகுதியில் போக்குவரத்து மாற்றம் செய்யப்படுகிறது.
இந்த நாள்களில் காமராஜர் சாலையில், கலங்கரை விளக்கம் முதல் போர் நினைவுச் சின்னம் வரை காலை 6 மணி முதல் காலை 10 மணி வரை வாகனங்கள் அனுமதிக்கப்படாது. அடையாறு பகுதியிலிருந்து காமராஜர் சாலையில் பாரிமுனை நோக்கி செல்லும் சரக்கு, வணிக வாகனங்கள் கிரின்வேஸ் சாலை சந்திப்பிலிருந்து ஆர்.கே. மடம் சாலை, வி.கே. ஐயர் சாலை, தேவநாதன் சாலை, செயின்ட் மேரீஸ் சாலை, ராமகிருஷ்ணா மடம் சாலை, லஸ் சந்திப்பு, லஸ் சர்ச் சாலை, கற்பகாம்பாள் நகர், சிவசாமி சாலை, ராயப்பேட்டை நெடுஞ்சாலை, ராயப்பேட்டை மணிக்கூண்டு, ஒயிட்ஸ் சாலை, ஸ்மித் சாலை, அண்ணா சாலை வழியாக பாரிமுனையை சென்றடையலாம்.
இதேபோல, அடையாறு பகுதியிலிருந்து காமராஜர் சாலையில் பிராட்வே நோக்கி செல்லும் பிற வாகனங்கள், (அரசுப் பேருந்துகள் உள்பட) சாந்தோம் நெடுஞ்சாலை, கச்சேரி சாலை நோக்கி திருப்பப்படும். இந்த வாகனங்கள் கச்சேரி சாலை, லஸ் சந்திப்பு, கற்பகாம்பாள் நகர், சிவசாமி சாலை, ராயப்பேட்டை நெடுஞ்சாலை, ராயப்பேட்டை மணிக்கூண்டு, ஒயிட்ஸ் சாலை, ஸ்மித் சாலை, அண்ணா சாலை வழியாக பாரிமுனை சென்றடையலாம்.
மேலும், டாக்டர் ராதாகிருஷ்ணன் சாலையில் காந்தி சிலை நோக்கி செல்லும் அரசுப் பேருந்துக்கள் டாக்டர் ராதாகிருஷ்ணன் சாலை வழியாக விடப்பட்டு வி.எம். தெரு சந்திப்பில் ராயப்பேட்டை நெடுஞ்சாலை வழியாக திருப்பிவிடப்படும். பின்னர், அந்த வாகனங்கள் வி.எம். தெரு, ராயப்பேட்டை நெடுஞ்சாலை, லஸ் சந்திப்பு, ராமகிருஷ்ணா மடம் சாலை, மந்தைவெளி சந்திப்பு, தெற்கு கெனால் பேங்க் சாலை, சீனிவாசபுரம் வழியாக பட்டினப்பாக்கம் சென்றடையலாம்.
அதேபோல, மயிலாப்பூர் சந்திப்பிலிருந்து சிவசாமி சாலை வழியாக காந்தி சிலை நோக்கி வரும் அரசுப் பேருந்துக்கள் ராயப்பேட்டை நெடுஞ்சாலை, ராயப்பேட்டை மேம்பாலம் நோக்கி திருப்பி விடப்பட்டு, ராயப்பேட்டை மணிக்கூண்டு, ஒயிட்ஸ் சாலை, ஸ்மித் சாலை, அண்ணா சாலை வழியாக பாரிமுனை சென்றடையலாம்.
மயிலாப்பூர் சந்திப்பிலிருந்து சிவசாமி சாலை வழியாக அண்ணா சதுக்கம் நோக்கி வரும் அரசுப் பேருந்துக்கள் ராயப்பேட்டை நெடுஞ்சாலை, ராயப்பேட்டை மேம்பாலம் நோக்கி திருப்பி விடப்பட்டு, அவை ஒயிட்ஸ் சாலை,ஸ்மித் சாலை,அண்ணா சாலை, வாலாஜா சாலை வழியாக அண்ணா சதுக்கம் சென்றடையலாம்.
டாக்டர் இராதாகிருஷ்ணன் சாலையில் காந்தி சிலை நோக்கி செல்லும் அனைத்து வாகனங்களும் டாக்டர் நடேசன் சாலை சந்திப்பில் இருந்து டாக்டர் நடேசன் சாலை, அவ்வை சண்முகம் சாலை சந்திப்பு வழியாக காமராஜர் சாலை நோக்கி ஐஸ் அவுஸ் சந்திப்பு நோக்கி திருப்பி விடப்படும்.
டாக்டர் பெசன்ட் சாலையிலிருந்து காமராஜர் சாலை நோக்கி வரும் வாகனங்கள் பெசன்ட் சாலை ரவுண்டானாவில் ஐஸ் ஹவுஸ் நோக்கி திருப்பி விடப்படும். பாரதி சாலை, பெல்ஸ் சாலை சந்திப்பில் காமராஜர் சாலை நோக்கி வரும் வாகனங்கள் பாரதி சாலை, பெல்ஸ் சாலை சந்திப்பில் பெல்ஸ் சாலை நோக்கி திருப்பி விடப்படும்.
வாலாஜா சாலை, பெல்ஸ் சாலை சந்திப்பில் உழைப்பாளர் சிலை நோக்கி வரும் வாகனங்கள் (அரசுப் பேருந்துகள் தவிர்த்து) பெல்ஸ் சாலை வழியாக திருப்பி விடப்படும். அரசுப் பேருந்துகள் கெனால் சாலை சந்திப்பு வரை அனுமதிக்கப்படும். இதற்காக அண்ணா சதுக்கம் அருகில் உள்ள பேருந்து நிறுத்தம் தற்காலிகமாக வாலாஜா சாலை விருந்தினர் மாளிகை அருகில் மாற்றப்படும் என்று அதில் குறிப்பிடப்பட்டுள்ளது.