கலாநிதிமாறன் மூலம் கருணாநிதி குடும்பத்து சம்பந்தியாகும் நடிகர் விக்ரம்
சென்னை: திமுக தலைவர் கருணாநிதியின் கொள்ளுப்பேரனுக்கு தமது மகளை திருமணம் செய்து கொடுத்து அந்த குடும்பத்து சம்பந்தியாகிறார் நடிகர் விக்ரம். இந்த சம்பந்த ஏற்பாட்டுக்கு உறுதுணையாக இருந்தது சன் குழும தலைவர் கலாநிதி மாறன்தானாம்..
கெவின் கேர் நிறுவனர் தொழிலதிபர் சி.கே. ரங்கநாதனின் மகன் மனு ரஞ்சித்துக்கும் நடிகர் விக்ரமின் மகள் அக்ஷிதாவுக்கும் ஜூலை 10-ந் தேதி திருமண நிச்சயதார்த்தம் நடைபெற உள்ளது.
கெவின் கேர் ரங்கநாதன் திருமணம் செய்திருப்பது யாரை எனில், திமுக தலைவர் கருணாநிதியின் மூத்த மகன் மு.க. முத்துவின் மகள் தேன்மொழியைத்தான்... இவர்களது மகன்தான் மனு ரஞ்சித்.
அதாவது நடிகர் விக்ரம் மகளுக்கு திருமணம் நிச்சயிக்கப்பட்டிருப்பது கருணாநிதியின் கொள்ளுப் பேரனுக்கு...
இதில் கலாநிதி மாறன் எங்கே வருகிறார்? என்ற கேள்வி வருகிறதா?
சன் குழும தலைவர் கலாநிதி மாறனுக்கு மிகமிக நெருக்கமானவர்களில் தினகரன் பதிப்பாசிரியர் ஆர்.எம்.ஆர். மற்றும் நடிகர் விக்ரமும் அடங்குவர். ஆர்.எம்.ஆர், நடிகர் விக்ரம் இருவரும் கலாநிதி மாறனைவிட ஒரு ஆண்டு லயோலா கல்லூரி சீனியர்ஸ்.
கல்லூரி கால நட்பை இன்று வரை இவர்கள் தொடர்ந்து பேணி வருகின்றனர். இப்போது கலாநிதி மாறனின் குடும்பத்துக்குள் நடிகர் விக்ரம் சம்பந்தியாகி இருக்கிறார்.
இதில் சுவாரசியம் என்னவெனில் மனு ரஞ்சித்தும் அக்ஷிதாவும் காதலித்து வந்துள்ளனர். இந்த காதலுக்கு பச்சைகொடி காட்டி திருமணத்தை இருவீட்டார் சம்மதத்துடன் நடத்துவதில் விக்ரமின் நண்பரான கலாநிதி மாறன் பங்கு நிச்சயம் இல்லாமல் இல்லை என்கின்றனர் இருதரப்பினரும்..
ஆக.. இனி கருணாநிதி குடும்பத்தில் கலாநிதியின் நண்பரான நடிகர் விக்ரமும் "சம்பந்தி" என ஒரு அங்கமாகிறார்!