சென்னையில் இன்றாவது பெய்யுமா மழை?
சென்னை: சென்னையில் இன்று மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.
கடந்த டிசம்பரில் மழை வெள்ளத்தில் தத்தளித்த சென்னை, அதன் பிறகு ஒரு துளி மழையைக் கூட கண்டதில்லை.
ஆனால் தமிழகத்தின் பல பகுதிகளில் அவ்வப்போது மழை பெய்து வருகிறது. கோடை ஆரம்பிப்பதற்கு முன்பே சென்னையில் வெளியில் கொளுத்த ஆரம்பித்துவிட்டது. அவ்வப்போது வெயில் அளவு 100லிருந்து 102 வரை அனல் கக்கியது.
அக்னி நட்சத்திரம் என்று அழைக்கப்படும் கத்திரி வெயில் நீடித்தாலும், வெப்பச் சலனத்தின் காரணமாக கடந்த சில நாள்களாக தமிழகத்தின் பல்வேறு இடங்களில் மழை பெய்து வருகிறது. இதனால், வெப்பத்தின் தாக்கம் ஓரளவு குறைந்து காணப்படுகிறது.
இந்த நிலையில், செவ்வாய்க்கிழமை காலை நிலவரப்படி ஊட்டியில் 20 மீ.மீ.. மதுரை மாவட்டம் சித்தாம்பட்டி, ராதாபுரம், வேலூர் மாவட்டம் ஆலங்காயம், சேலம் ஆகிய இடங்களில் 10 மி.மீ. மழை பதிவாகியுள்ளது. சென்னையில் அவ்வப்போது மப்பும் மந்தாரமுமாக இருந்தாலும் மழை இல்லை.
இதுதொடர்பாக வானிலை ஆய்வு மைய அதிகாரிகள் கூறியது:
பகல் நேரங்களில் மேற்கு, தென்மேற்கு பகுதியில் இருந்து காற்று வீசுவதால் வெப்பத்தின் தாக்கம் ஓரளவு காணப்படுகிறது. மாலை, இரவு நேரங்களில் தென்கிழக்கு பகுதியில் இருந்து நிலப்பரப்புக்குள் காற்று வீசுவதால் வெப்பத்தின் தாக்கம் குறைந்து காணப்படும்.
உள் மாவட்டங்கள், கடலோர மாவட்டங்கள், புதுச்சேரியில் ஒரிரு இடங்களில் மழை பெய்ய வாய்ப்புள்ளது. சென்னையில் வானம் மேக மூட்டத்துடன் காணப்படும் என்றார்.
நேற்றைய வெயில் நிலவரம்:
வேலூர் 102 டிகிரி
சேலம், கரூர் 101 டிகிரி
மதுரை 100 டிகிரி
சென்னை 99 டிகிரி
கோவை 96.8 டிகிரி