சூர்யா ரசிகர்களுக்கு அதிர்ச்சி... ரூ.6.5 லட்சம் செலவில் வைக்கப்பட்ட கட் அவுட் அகற்றம்
Recommended Video
திருவள்ளூர்: திருத்தணி புறவழிச்சாலையில் ரூ 6.5 லட்சம் செலவில் வைக்கப்பட்டிருந்த 220 அடி உயர சூர்யா கட் அவுட் அகற்றப்பட்டது.
நீண்ட இடைவேளைக்கு பிறகு செல்வராகவன் இயக்கத்தில் என்ஜிகே படம் வெளியாக உள்ளது. இந்த படம் நாளை வெளியாக உள்ள நிலையில், நடிகர் சூர்யாவுக்கு 220 அடியில் கட் அவுட்டை ரசிகர்கள் வைத்துள்ளனர்.
அனுமதியின்றி பிரமாண்ட கட் அவுட் வைக்கப்பட்டுள்ளதாக கூறி, நகராட்சி ஆணையர் ராஜேஸ்வரி தலைமையில் ஊழியர்கள் கட் அவுட்டை அகற்றி வருகின்றனர்.
'அந்தர்கி வணக்கம்' பதவியேற்பு விழாவில் தெலுங்கில் பேசிய திமுக தலைவர் ஸ்டாலின்.. புன்னகைத்த ஜெகன்!
செல்வராகவன் - சூர்யா கூட்டணி
இயக்குநர் செல்வராகவன் - சூர்யா கூட்டணியில் உருவாகியிருக்கும் படம் என்.ஜி.கே. இந்த படத்தில் சூர்யாவுக்கு ஜோடியாக சாய் பல்லவி, ரகுல் ப்ரீத் சிங் ஆகியோர் நடித்துள்ளனர். படத்தை எஸ்.ஆர்.பிரபு தயாரித்துள்ளார். யுவன் சங்கர் ராஜா இசையமைத்துள்ள இந்தப் படத்திற்கு ‘யு' சான்றிதழ் கிடைத்துள்ளது.
அரசியல் பின்னணி
முழுக்க முழுக்க அரசியல் பின்னணியை மையப்படுத்திய இப்படம் எடுக்கப்பட்டுள்ளது. நாளை இந்த படம் திரைக்கு வருகிறது. நடிகர் சூர்யாவுக்கு இதற்கு முன் வெளியான, தானா சேர்ந்த கூட்டம் படத்திலும், அரசியல் பேசப்பட்ட நிலையில், மீண்டும் அரசியலை மையப்படுத்திய படத்தில் நடித்துள்ளார்.
திருவிழா கோலம்
படத்தை பிரபலப்படுத்தும் பணிகளில் படக்குழு ஈடுபட்டு வரும் நிலையில், சூர்யா ரசிகர்களும் படத்திற்கான விளம்பரத்தில் முழு வீச்சில் ஈடுபட்டு வருகின்றனர். நாளை வெளியாக உள்ள திரையரங்குகளில், தோரணங்கள், தங்கள் கற்பனைக்கு ஏற்றவகையிலான கட் அவுட்கள் என திருவிழா போல், ஏற்பாடுகள் செய்து வருகின்றனர். சூர்யா படம் வெளியாகி கிட்டத்தட்ட 2 ஆண்டுகள் ஆகியுள்ளதால், படத்தை ரசிகர்கள் எதிர்பார்த்து காத்திருக்கின்றனர்.
சமூக வலைதளங்களில் வைரல்
இந்தநிலையில், நடிகர் சூர்யாவுக்கு இன்ப அதிர்ச்சி அளிக்கும் விதமாக இதுவரை யாருக்கும் வைக்காத உயரத்திற்கு கட் அவுட் வைக்க ரசிகர்கள் திட்டமிட்டனர். அதன்படி திருவள்ளூர் மாவட்டத்தில் சூர்யாவுக்கு 220 அடியில் கட் அவுட் வைக்க திட்டமிட்டு, அவரது ரசிகர்கள் சில தினங்களுக்கு முன் பூஜையுடன் வேலைகளை தொடங்கினர். அந்த பணி முடிந்து, நேற்று கட் அவுட் பிரமாண்டமாக வைக்கப்பட்டது. இந்த கட் அவுட்டின் புகைப்படங்கள் சமூக வலைதளங்களில் வைரலாகி வந்தது.
கட் அவுட் அகற்றம்
இதற்கு முன்னதாக விஸ்வாசம் படத்திற்காக நடிகர் அஜித்திற்கு வத்தலக்குண்டில் 190 அடியில் கட் அவுட் வைக்கப்பட்டிருந்தது. இந்த சாதனையை முறியடிக்க வேண்டும் என்ற எண்ணத்தில் சூர்யா ரசிகர்கள் 220 அடிக்கு கட் அவுட் வைத்திருந்தனர். ஆனால், முறையான அனுமதி பெறாததால் கட் அவுட்டை நகராட்சி ஊழியர்கள் அகற்றினர். ஆசையுடன் வைக்கப்பட்ட மாஸ் கட் அவுட், பட ரிலீஸ் முன்பே அகற்றப்பட்டது, சூர்யா ரசிகர்களை வருத்தமடைய வைத்துள்ளது.