ஒரே நாளில் 2 பிணங்கள்.. ஆண் தூக்கில் தொங்கியும், பெண் எரிந்தும்.. குற்றாலம் அருகே பரபரப்பு

திருநெல்வேலி: நெல்லை மாவட்டம் குற்றாலம் அருகே நன்னகரம் என்ற பகுதியில் எரிந்த நிலையில் ஒரு பெண் பிணமும், ஐந்தருவி பகுதியில் ஆண் பிணம் தூக்கில் தொங்கிய நிலையிலும் மீட்கப்பட்டன.

நன்னகரம் பகுதியில் எரிந்த நிலையில் பெண் பிணம் கிடப்பதாக குற்றாலம் போலீசாருக்கு தகவல் கிடைக்கவே போலீசார் விரைந்து சென்றனர். நன்னகரம் தேவேந்திரகுல சமூகத்திற்குப் பாத்தியப்பட்ட நொண்டி மாடசாமி கோவில் அருகே மல்லாந்த நிலையில் ஒரு பெண் தீ வைத்து எரிந்த நிலையில் கிடந்தார். அங்கு கிடந்த மண்ணெண்ணை கேன் மற்றும் தீப்பெட்டி உள்ளிட்டவைகளை போலீஸார் கைப்பற்றினர்.

இந்த பெண் தற்கொலை செய்து கொண்டாரா அல்லது யாரும் கொலை செய்து கொண்டு வந்து போட்டு எரித்து சென்றார்களா என்பது தெரியவில்லை. உடலைக் கைப்பற்றி உடற்கூறு ஆய்வுக்கு தென்காசி மருத்துவமனைக்கு போலீஸார் அனுப்பி வைத்தனர்.

இந்த நிலையில், குற்றாலம் ஐந்தருவி சாலையில் உள்ள காட்டுப்பகுதியில் தனியாருக்கு சொந்தமான கட்டி முடிக்கப்படாத கட்டிடத்தில் தூக்கில் தொங்கிய நிலையில் அழுகிய நிலையில் ஒரு ஆண் பிணம் கிடப்பதாக குற்றாலம் போலீஸாருக்கு தகவல் கிடைக்கவே விரைந்து சென்ற அவர்கள் அழுகிய நிலையில் மரத்தில் தூக்கிட்டு தற்கொலை செய்த உடலை கைப்பற்றினர்.

விசாரணையில், அவர் திருநெல்வேலி-சங்கரன் கோவில் சாலையில் உள்ள அழகியபாண்டியபுரம் பகுதியை சேர்ந்த சங்கு என்பதும் அவர் மனநலம் பாதிக்கப்பட்டவர் என்றும் அவர் கடந்த 17ஆம் தேதி பாவூர்சத்திரம் அருகே சாலையில் விழுந்து காயமடைந்து பின்னர் தென்காசி அரசு மருத்துவமனையில் சிகிச்சை பெற்று வந்துள்ளார் என்பதும் தெரிய வந்தது.

ஒரே நாளில் அடையாளம் தெரியாத பெண் எரிந்த நிலையிலும், காட்டுப்பகுதியில் ஆண் பிணமும் கண்டெடுக்கபட்டது குற்றாலத்தில் பரபரப்பை ஏற்படுத்தியது.

English summary

Two dead bodies have been recovered near Courtallam and police are investigating.