முன்னாள் அமைச்சர் எஸ்.பி.வேலுமணியின் வீட்டில் லஞ்ச ஒழிப்புத்துறை சோதனை...அதிர்ச்சியில் அதிமுக நிர்வாகிகள்!

ஊழல் குற்றச்சாட்டு தொடர்பாக முன்னாள் அமைச்சர் எஸ்.பி.வேலுமணியின் வீடு உள்ளிட்ட 35 இடங்களில் இன்று லஞ்ச ஒழிப்புத்துறை போலீசார் சோதனை நடத்தி வருகின்றனர்.

கோவை தொண்டாமுத்தூர் தொகுதி எம்.எல்.ஏ.,வாக உள்ள எஸ்.பி.வேலுமணி கடந்த 2013-16-ம் ஆண்டு வரை நகராட்சி நிர்வாகம், ஊரக வளர்ச்சி மற்றும் சட்டம், நீீதிமன்றங்கள் துறை அமைச்சராக இருந்தார்.

அதிமுக ஆட்சியில் அமைச்சராக இருக்கும் பொழுது இவர் மீது ஏராளமான ஊழல் குற்றச்சாட்டுகள் கூறப்பட்டு வந்தன.

கோவை மாநகராட்சியில் செயல்படுத்தப்பட்ட 24 மணி நேர குடிநீர் திட்டப்பணிகள், ஸ்மார்ட்சிட்டி திட்டப்பணிகள் என பல திட்டப்பணிகளில் தேவையான தொகையை விட அதிக தொகை நிர்ணயிக்கப்பட்டு மோசடிகள் நடந்துள்ளதாகவும் புகார்கள் கூறப்பட்டன.

இதைத் தொடர்ந்து லஞ்ச ஒழிப்புத்துறை டிஜிபி கந்தசாமி உத்தரவின் பேரில், லஞ்ச ஒழிப்புத்துறை போலீசார் இன்று எஸ்.பி.வேலுமணி உள்ளிட்ட குற்றம் சாட்டப்பட்டவர்களின் வீடுகளில் சோதனை நடத்தினர்.