சைக்காலஜிக்கலா? ஹாரரா? க்ளைமாக்ஸ் வரை பதட்டம்.. இந்த படத்தை தவறவிடாதீங்க!

முதல் காட்சியே ஒரு பெண் ஏதோ புதை குழியில் இருந்து தப்பிக்க முயற்சி செய்கிறாள். அவளது காலை ஏதோ மிருகம் போன்ற ஒன்று பிடித்து இழுக்க ஒருவழியாக தப்பித்து மேல வர, வெளியில் ஒரு மிருகம் போன்றது பெரிய கோடரியுடன் நின்று அவளை கொலை செய்கிறது. அடுத்த காட்சியில்,க்ளோவர் தனது நான்கு நண்பர்கள் மேக்ஸ், நினா, மேகன், ஏப் ஆகியோருடன் ஒரு காட்டுப்பகுதிக்கு ட்ரிப் செல்கிறாள். க்ளோவரின் சகோதரி ஒரு வருடமாக காணாமல் போன நிலையில், அவள் கடைசியாக எடுத்த வீடியோவில் இருந்த இடத்திற்கே அவர்கள் வந்துள்ளனர். இந்த உண்மை புதியதாக வந்த ஏப்புக்கு தெரியாது. மற்றவர்கள் அவனுக்கு விளக்க முயற்சிக்கும்போது, க்ளோவர் அருகிலிருந்த கடைக்குள் நுழைகிறாள். அங்கிருந்த கடைக்காரரிடம் சகோதரி மெலின் புகைப்படத்தை காட்டி அவளை பார்த்தீர்களா என்று கேட்கிறாள். அவர், ‘மெல் கடைசியாக க்ளோர் வேலியில் இருந்தார்; இங்கு பலரும் இப்படித்தான் காணாமல் போகிறார்கள்’ என்று சொல்கிறார்.

இதற்கிடையில் அவர்கள் பயணத்தைத் தொடர, கடும் புயல் மழை பொழிகிறது. அவர்கள் ஒரு இடத்தை நெருங்கும்போது அங்கு மட்டும் மழை இல்லாததை கவனிக்கிறார்கள். மழை நிற்கும் வரை இங்கு ஓய்வு எடுத்துவிட்டு போகலாம் என முடிவு செய்கிறார்கள். அந்த இடம் ஒரு மியூசியம் போல இருக்கிறது. சுற்றி பார்த்தபோது, அது க்ளோர் வேலி என்ற பெயருடைய இடம் என்பதையும் க்ளோவர் கவனிக்கிறாள். இதுவே தன் தங்கை இருக்கும் இடம் என நம்புகிறாள். மற்றவர்களும் மியூசியத்தை ஆராய ஆரம்பிக்கிறார்கள். அங்கு ஒரு வித்தியாசமான மணல் கடிகாரம், வருகைப் பதிவேட்டில் சற்றே விசித்திரமாக எழுதப்பட்ட பெயர்கள், போனில் சிக்னல் இல்லை , காணாமல் போனவர்களின் புகைப்படங்கள் என பல வினோதமான விஷயங்கள் இருக்கின்றன. மேகன் ரெஸ்ட் ரூமில் தண்ணீர் வரவில்லை என்கிறாள்; ஏப், பலகையில் காணாமல் போனவர்களின் படங்களை கவனிக்கிறான். இதனால் அந்த இடம் ஏதோ வினோதமாக இருக்கிறது என்பதில் அனைவருக்கும் சந்தேகம் எழுகிறது.

மேகன், க்ளோவர், மேக்ஸ் மூன்று பெரும் கட்டிடத்தின் அண்டர்கிரௌண்ட் சென்று அங்கிருக்கும் ஒவ்வொன்றையும் தேடுகிறார்கள். அதற்குள் மேலே இருக்கும் நினா, ஏப் அவர்களின் காரை யாரோ எடுக்க முயற்சிப்பதை கவனிக்கிறார்கள். ஏதோ சத்தம் கேட்க ஏப் அந்த இடத்திற்கு செல்ல முகமூடி அணிந்த ஒருவன் இரண்டு துண்டாக அவனை வெட்டுகிறான். சத்தம் கேட்ட இடத்தை பார்க்க சென்ற நினாவும் கொல்லப்பட, அடுத்து மேக்ஸ், மேகன், க்ளோவர் என இறக்கிறார்கள். எல்லாரும் இறந்துவிட்டார்கள் என நாம் நினைக்கும்போது, ஆரம்பத்தில் எங்கு நின்றார்களோ அதே இடத்தில நிற்க , நமக்கு பக் என இருக்கும். அந்த பலகையில் இப்போது இவர்களின் போட்டோ இருக்கும், மணல் கடிகாரம் தலைகீழாக மாறி இருக்கும். மேகனிற்கு கொஞ்சம் சக்தி இருப்பதால் அங்கிருக்கும் சில ஆவிகள் அவளிடம் பேச இந்த காட்சிகள் பதட்டமாகவே இருக்கும்.

நேரம் ஆக, மீண்டும் முகமூடி அணிந்த ஒருவன் இவர்களை கொலை செய்ய வருகிறான். அவனை எதிர்த்து போராட முயற்சிக்கும் இவர்களும் இறந்துவிடுகிறார்கள், ஆனால் மீண்டும் உயிர் பெறுகிறார்கள். அடுத்த முறை, எதுவுமே செய்யாமல் இருந்து, டாய்லெட்டில் இருந்த தண்ணீரை மட்டும் குடிக்கவே வெடித்து சிதறி இறக்கிறார்கள். அப்போது க்ளோவருக்கு கடைக்காரர் சொன்னது, ‘முயற்சி செய்யவில்லை என்றால் இங்கேயே இருக்க நேரிடும்’. இதனால் அவர்கள் மியூசியத்தில் உள்ள ஒவ்வொரு பொருளையும் தேட ஆரம்பிக்கிறார்கள். அப்போது ஒரு பழைய டேப் கிடைக்கிறது. அதில், அந்த கிராமமே ஒருகாலத்தில் சுரங்கம் தோண்டியதால் மண்ணுக்குள் புதைந்து விட்டது. பிழைத்தவர்களுக்கு சைக்கியாட்ரிக் ட்ரீட்மென்ட் செய்ய வந்த டாக்டர் எடுத்த வீடியோ காட்சிகளில் அவர்கள் வினோதமான மிருகங்களாக மாறுவதை காண்கிறார்கள். இதைப் பார்த்தபின், தங்களுடைய உடலிலும் பல வித்தியாசமான மாற்றங்கள் வந்திருப்பதை கவனிக்கிறார்கள்

ஒவ்வொரு முறையும் அவர்கள் பிழைத்து, இறக்க என பத பதைக்கும் காட்சிகளை படத்தில் வைத்துள்ளார்கள். அப்படி என்னதான் அடியில் இருக்கிறது தேடி பார்த்துவிடலாம் என முயற்சி செய்கிறார்கள். எத்தனாவது முறை இறந்தார்கள் என்று அவர்களுக்கே தெரியவில்லை. உடனடியாக அந்த வருகை பதிவேட்டில் இருக்கும் கையெழுத்தை பார்த்து இதுதான் கடைசி முறை என்பதை தெரிந்துகொள்ள, அவர்களுடன் இருந்த மேகன் காணவில்லை. ஏப், அவன் போனில் எடுத்த சில வீடியோக்களை பார்க்கிறான். அதில் அவர்கள் எப்படியெல்லாம் இறந்தார்கள் என பல வீடியோக்கள் உள்ளன. கடைசியாக, ஒரு வீடியோவில் எல்லோரும் இறக்க அந்த கடையில் இருந்தவன் தான் இதன் பின்னால் இருக்கிறான் அவனை பின் தொடர்கிறேன் என மேகன் செல்கிறாள். சரி மேகனை தேடி நான் செல்கிறேன் என க்ளோவர் சொல்ல, மற்றவர்கள் அங்கிருந்து தப்பிக்க வழியை தேடுகிறார்கள். முன்பை விட இப்போது நிறைய மிருகங்களை பார்க்கிறார்கள்.

மேகனை தேடிச் சென்ற க்ளோவர், தனது சகோதரி மெல் முழுமையாக கொடூர மிருகமாக மாறியிருப்பதை காண்கிறாள். வேறு வழியின்றி அவளை கொன்று விடுகிறாள். இதற்கிடையில், மேகன் ஒரு அறையில் அந்த மிருகத்துடன் அடைத்து வைக்கப்பட்டிருப்பதை பார்க்கிறாள். அவளை காப்பாற்ற சாவியை தேடி அலைந்துகொண்டிருக்கும் க்ளோவரை, கடைக்காரன் பார்த்து, ‘வந்துட்டியா? உன் நண்பர்களை உன் மனதுக்குள் ஓடவிட்டு கொண்டிருக்கிறாய், அவர்களை விடு, வெளியே வா. இதுவரை மூன்று முறை தற்கொலை முயற்சி செய்துவிட்டாய்,’ என்று சொல்கிறான். இது கேட்கும் போது நமக்கே ஒரு நொடி, இதெல்லாம் க்ளோவரின் கற்பனையா? என்று தோன்றும். அவன் சொல்வதை காதில் வாங்கிக்கொள்ளாத க்ளோவர், மேலிருந்து நீர் சொட்ட, அதை அவன் டீ கப்பில் விழச் செய்கிறாள். அந்த டீயை குடித்த டாக்டர் (கடைக்காரன்) சில நொடிகளில் வெடித்து சிதறி இறந்து விடுகிறான்.