PHOTOS : கடைசி நேர த்ரில் காட்டிய தோனி... பஞ்சாப் அணியிடம் தோல்வியை தழுவிய சென்னை அணி... சோகத்தில் ரசிகர்கள்!

ஐ.பி.எல்.போட்டியில் சென்னை அணியை 11 ரன்கள் வித்தியாசத்தில் வீழ்த்தி பஞ்சாப் அணி வெற்றி பெற்றது.

188 ரன்கள் இலக்கை நோக்கி களம் இறங்கிய சென்னை அணிக்கு ஓப்பனிங் ஜோடி இந்தமுறையும் நீண்ட நேரம் நீடிக்கவில்லை. இரண்டாவது ஓவரிலேயே உத்தப்பா ஒரு ரன்னோடு பெவிலியனுக்கு நடையை கட்டினார். 

அடுத்தடுத்து இறங்கிய சான்டனர், ஷிவம் துபே ஒற்றை இலக்க ரன்களோடு வெளியேறினர். பின்னர் ருதுராஜ் கெய்க்வாடும் அம்பதி ராயுடுவும் கூட்டணி சேர்ந்தனர்.

வழக்கத்துக்கு மாறாக, அம்பதி ராயுடு இன்று வந்தது முதலே அதிரடியாக விளையாடினார். ஓப்பனர் ருதுராஜ் கெய்க்வாட் 30 ரன்கள் எடுக்கும் முன்னதாக, ராயுடு 30 ரன்களை தாண்டி சேர்த்தார். 

சிறிதுநேரத்தில் கெய்க்வாட் 30 ரன்களில் ஆட்டமிழக்க, ராயுடு ஒற்றை நபராக பஞ்சாப் பந்துவீச்சை துவம்சம் செய்தார். 

6 சிக்ஸர்களை விலகிய ராயுடு, குறிப்பாக சந்தீப் சர்மா வீசிய 16வது ஓவரில் மட்டும் ஹாட்ரிக் சிக்ஸ் மற்றும் ஒரு பவுண்டரி அடித்தார்.

எனினும், ரபாடா வீசிய 18வது ஓவரில் யார்க்கர் பந்தில் போல்டாகி 78 ரன்களுக்கு ஆட்டமிழந்தார்.

12 பந்துகளில் 35 ரன்கள் தேவைப்பட்ட போது தோனி களம் புகுந்தார். இதனால் ஆட்டத்தில் சுவாரஸ்யம் கூடியது. கடந்த போட்டியில் இறுதி ஓவரில் அணியை வெற்றிபெற வைத்த அவர் மீது எதிர்பார்ப்பு கூடியது. 

அதற்கேற்ப 19வது ஓவரில் தோனி ஒரு பவுண்டரி அடிக்க, கடைசி 6 பந்துகளில் 27 ரன்கள் தேவைப்பட, ரிஷி தவான் வீசிய முதல் பந்தை சிக்ஸராக பறக்கவிட்ட அவர், மூன்றாவது பந்தில் சிக்ஸ் அடிக்க முயன்று கேட்ச் மூலம் அவுட் ஆனார்.