கரப்பான் பூச்சி போல் கவிழ்ந்த அரசு பேருந்து.. நல்ல வேளை பெரிய ஆபத்து ஏற்படலை!

சென்னை கோயம்பேட்டில் இருந்து ரெட்ஹில்ஸ் வரையிலான தடம் எண் 114 எண்ணை கொண்ட பேருந்து இயக்கப்பட்டு வருகிறது

வழக்கம் போல் பேருந்து இயக்கப்பட்டு வந்த நிலையில் , பேருந்தை சேகர் (50) என்ற ஓட்டுனர் இயக்கினார்.

கோயம்பேட்டில் இருந்து சென்னை மாதவரம் ரவுண்டானா அருகில் பேருந்து வந்த போது திடீரென அங்கிருந்த மேம்பால சுவரில் மோதி உள்ளது.

மோதிய வேகத்தில் பேருந்து கவிழ்ந்து அதில் பயணித்த 8 பயணிகளுக்கு பலத்த காயம் ஏற்பட்டது.

ஆம்புலன்ஸ் வரவழைக்கப்பட்டு காயம் அடைந்த பயணிகளை அரசு மருத்துவமனையில் சிகிச்சைக்காக அனுமதிக்கப்பட்டனர்.

இச்சம்பவம் குறித்து மாதவரம் போக்குவரத்து புலனாய்வு போலீசார் சம்பவ இடத்திற்கு விரைந்து வந்தனர்.

சம்பவ இடத்தில் விசாரணை மேற்கொண்ட காவல் துறையினர் விசாரணையில் ,அரசு பேருந்து ஓட்டுனர் தூக்க கலக்கத்தில் பேருந்தை இயக்கியதாக தெரிய வந்துள்ளது.

ஓட்டுனரை கைது செய்த போலீசார் மேலும் விசாரணை செய்து வருகின்ற நிலையில் இச்சம்பவத்தால் போக்குவரத்து நெரிசல் ஏற்பட்டு அப்பகுதி முழுவதும் பரபரப்பு ஏற்பட்டது.