துருப்புச்சீட்டான ‛ரம்பா’.. விக்ரம் லேண்டரின் மாஸ் பின்னணி! சாதிக்கப்போகும் சந்திரயான் 3.. எப்படி?

பெங்களூர்: நிலவின் தென்துருவத்தில் வெற்றிகரமாக விக்ரம் லேண்டர் தரையிறங்கி சாதித்த நிலையில் சந்திரயான் 3 திட்டத்தின் ‛ரம்பா' பங்களிப்பு பற்றியும், விக்ரம் லேண்டர் செயல்படுவது குறித்த முக்கிய தகவல்கள் வெளியாகி உள்ளன.

இந்தியா நிலவின் தென்துருவத்தை ஆய்வு செய்ய சந்திரயான் எனும் விண்வெளி திட்டத்தை உருவாக்கியது. ஏற்கனவே சந்திரயான் 1 மற்றும் சந்திரயான் 2 திட்டங்களை இந்தியா செயல்படுத்தி உள்ளது. இதன் தொடர்ச்சியாக பிஎஸ்எல்வி எல்விஎம் 3 ராக்கெட் மூலம் கடந்த மாதம் 14ம் தேதி சந்திரயான் 3 விண்ணில் பாய்ந்தது.

இந்த ராக்கெட்டில் உந்துவிசை கலன், விக்ரம் லேண்டர், பிரக்யான் ரோவர் உள்ளிட்டவை இடம்பெற்றிருந்தது. திட்டமிட்டப்படி உந்துவிசை கலனில் இருந்து விக்ரம் லேண்டர் பிரிந்து நிலவின் தரைப்பகுதியை நோக்கி தரையிறங்கியது.

மேலும் நிலவின் சுற்றுவட்டபாதையில் இருந்த சந்திரயான் 2 ஆர்ப்பிட்டரும் விக்ரம் லேண்டர் தொடர்பை ஏற்படுத்தி நேற்று மாலையில் சாப்ட் லேண்டிங் முறையில் நிலவின் தென்துருவத்தில் கால்பதித்தது. இதையடுத்து விக்ரம் லேண்டரில் இருந்து பிரக்யான் ரோவர் வாகனம் வெளியேறி ஆய்வை தொடங்கி உள்ளது.

இந்த பிரக்யான் ரோவர் 14 நாட்கள் அங்கு ஆய்வு செய்யும் நிலையில் விக்ரம் லேண்டர் அங்கு என்ன செய்யும்? அதன் பணி என்ன? என்பது குறித்த கேள்விகள் பலருக்கும் எழுந்துள்ளது. அதற்கான விடை என்னவென்றால் பிரக்யான் ரோவர் வழங்கும் தகவல்களை விக்ரம் லேண்டர் பெற்று ஆர்ப்பிட்டர் மூலம் பூமிக்கு அனுப்பும் பணியை செய்ய உள்ளது.

அதோடு விக்ரம் லேண்டரும் நிலவில் ஆய்வு செய்ய உள்ளது. இதற்காக விக்ரம் லேண்டரில் மொத்தம் 6 ஆய்வு கருவிகள் உள்ளன. இதில் முதல் கருவியின் பெயர் என்பது ChaSTE. இது நிலவின் மேற்பரப்பில் இருக்கும் வெப்பத்தின் அளவை தெர்மோபிசிக்கல் சோதனை மூலம் மேற்கொள்ளும். அதன்பிறகு 2வது கருவியின் பெயர் ILSA என்பதாகும். இது நிலவில் உள்ள அதிர்வுகளை அளவீடும் பணியை மேற்கொள்ளும்.

அதன்பிறகு 3 வது கருவியின் பெயர் ரம்பா (RAMBHA). இது நிலவில் உள்ள வாயுக்கள் மற்றும் பிளாஸ்மா சோதனைகளை செய்யும். இதன்மூலம் நிலவில் உள்ள வாயுக்கள் மற்றும் நியூட்ரான், எலக்ட்ரான் உள்ளிட்டவை உள்ளதா? என்பதை மேற்கொள்ளும். இந்த கருவி மூலம் தான் அங்கு இருக்குள் வாயுக்கள் குறித்த விபரங்களை அறிய முடியும். இதனால் ரம்பா கருவி என்பது இந்த திட்டத்தில் முக்கிய பங்காற்றி வருகிறது.

அடுத்ததாக 4வது கருவி என்பது APXS. ஆல்பா பார்ட்டிகிள் எக்ஸ்ரே ஸ்பெக்ட்ரோ மீட்டர் என்பது இதன் அர்த்தமாகும். இது நிலவின் மேற்பரப்பில் உள்ள துகள்களின் கலவை எப்படிப்பட்டது என்பதை கண்டறியும் ஆய்வை மேற்கொள்ளும். 5வது கருவி என்பது LIBS. இது லேசர் இன்டியூஸ்ட் பிரேக்டவுன் ஸ்பெக்ட்ரோஸ்கோப் என அழைக்கப்படும். லேசர் ஆய்வை செய்யும். 6வது கருவி என்பது ரெட்ரோரெஃப்ளெக்டர் ஆரே என அழைக்கப்படுகிறது. இது நிலவு ஆய்வுக்காக நாசா வழங்கிய கருவியாகும். இதுவும் அங்கு ஆய்வு செய்ய உள்ளது.

English summary

With the successful landing of the Vikram lander on the south pole of the Moon, important information about the contribution of the Chandrayaan 3 project 'RAMBHA' and the operation of the Vikram lander has been revealed.