பெண் என்றால் நான் அன்றோ..விடை கொடுத்தார் ’பன்முக கலைஞர்’ சிஐடி சகுந்தலா! திரையுலகினர் கண்ணீர் அஞ்சலி
சென்னை: தமிழ் திரையுலகம் மட்டுமல்லாது தெலுங்கு, மலையாளம், கன்னடம் என பல்வேறு மொழிகளில் நடித்து புகழ்பெற்ற பழம் பெரும் நடிகையான சகுந்தலா என்ற சிஐடி சகுந்தலா காலமானார். அவருக்கு வயது 84.
தமிழ் திரை உலகில் நாடகங்களில் இருந்து வந்து புகழ் பெற்ற நடிகர்கள் காலத்தால் அழியாத தனி இடத்தை பெற்று இருக்கின்றனர். அப்படி ஒருவர் தான் சகுந்தலா.
சேலம் மாவட்டத்தை சேர்ந்த சகுந்தலா சென்னையில் நாடகங்களில் நடிக்க வந்தார். அப்போது பிரபலமாக இருந்த லலிதா, பத்மினி, ராகினி உள்ளிட்டோர் நடத்தி வந்த நடன நாடகங்களில் நிகழ்ச்சிகள் பாடல்களுக்கு நடனம் ஆட்ய்வது தான் அவரது வழக்கம்.
துள்ளலான அவரது நடனத்தோடு கூடிய முகபாவனைகள் அப்போது பெரும் வரவேற்பை பெற்றது. நாடகங்களில் சிறிய சிறிய வேடங்களில் நடித்து வந்தார் அவர். 1970 ஆம் ஆண்டு ஜெய்சங்கர் நடிப்பில் வெளியான சிஐடி சங்கர் தான் அவரது முதல் படம் அதற்குப் பிறகு அவர் சிஐடி சகுந்தலா என்று அழைக்கப்பட்டார்.
வில்லனாக அறிமுகமாகி நாயகனாக உயரும் நடிகர்களைப் போல, ஒரு நடன கலைஞராக அறிமுகமாகி, அதன்பிறகு குணச்சித்திர வேடங்களில் நடித்து கதாநாயகியாக உயர்ந்தவர் சிஐடி சகுந்தலா. சிவாஜி கணேசன், எம்ஜிஆர், ஜெய்சங்கர் போன்ற முன்னணி நடிகர்களுடன் அவர் நடித்துள்ளார். குறிப்பாக சிவாஜி கணேசனுடன் நடித்த தில்லானா மோகனாம்பாள், பாரதவிலாஸ், வசந்த மாளிகை உள்ளிட்ட பல படங்கள் காலத்தால் அழியாதவை.
அது மட்டுமல்லாமல் படிக்காத மேதை, திருடன், தவப் புதல்வன், ராஜராஜ சோழன், என் அண்ணன், இதயவீணை உள்ளிட்ட பல படங்களை நடித்திருக்கிறார். தமிழ் மட்டுமல்லாது தெலுங்கு, மலையாளம், கன்னடம் உள்ளிட்ட தென்னிந்திய மொழிகளிலும் ஏராளமான படங்களில் நடித்திருக்கிறார் சிஐடி சகுந்தலா.
தொடர்ந்து சினிமாவில் இருந்து ஒதுங்கிய அவர் சின்னத்திரை தொடர்களில் நடித்து வந்தார். அதற்குப் பிறகு உடல் நலக் குறைவால் பெங்களூரு சென்ற அவர் தனது மகள் வீட்டில் தங்கி இருந்தார். இந்த நிலையில் அவருக்கு நேற்று ( செப்டம்பர் 17ஆம் தேதி) திடீரென நெஞ்சுவலி ஏற்பட்டது. இதனையடுத்து தனியார் மருத்துவமனையில் அனுமதிக்கப்பட்ட அவர் சிகிச்சை பலனின்றி உயிரிழந்ததாக அவரது குடும்பத்தினர் தெரிவித்துள்ளனர். பழம் பெரும் நடிகையான சகுந்தலாவின் மறைவுக்கு திரையுலகினர், ரசிகர்கள் என பல தரப்பினரும் ஆழ்ந்த இரங்கலை தெரிவித்து வருகின்றனர்.
Click it and Unblock the Notifications
Sign in with Google