கோவை & மதுரை மெட்ரோ ரயில் திட்டங்களுக்கு ஒப்புதல்? “பட்ஜெட்”.. 6 விஷயங்களை நினைவூட்டிய ஸ்டாலின்!

சென்னை: நாடாளுமன்றத்தில் தாக்கல் செய்யப்படவுள்ள மத்திய பட்ஜெட்டில், 3 ஆண்டுகளாக விடுவிக்கப்படாமல் இருக்கும் சென்னை மெட்ரோ ரயில் திட்டத்திற்கான நிதி விடுவிக்கப்படும் என எதிர்பார்ப்பதாக தமிழக முதல்வர் ஸ்டாலின் தெரிவித்துள்ளார்.

மத்திய அரசின் 2024-25 ஆம் நிதியாண்டிற்கான விரிவான பட்ஜெட், வரும் 23 ஆம் தேதி (செவ்வாய்க்கிழமை) நாடாளுமன்றத்தில் தாக்கல் செய்யப்பட உள்ளது. பிரதமராக மோடி மூன்றாவது முறையாக பதவியேற்ற பின், முதல்முறையாக நாளை நாடாளுமன்ற பட்ஜெட் கூட்டத் தொடர் தொடங்க உள்ளது. அதைதொடர்ந்து, பட்ஜெட்டை, நிதி அமைச்சர் நிர்மலா சீதாராமன் வரும் 23 ஆம் தேதி தாக்கல் செய்ய உள்ளார்.

மோடி 3.0 அரசின் முதல் பட்ஜெட் என்பதால், இதன் மீது பல்வேறு எதிர்பார்ப்புகள் நிலவுகிறது. குறிப்பாக நடுத்தர மக்கள் பயன்பெறும் வகையிலும், வரிச்சுமையை குறைக்கும் வகையிலும் பல்வேறு அறிவிப்புகள் மத்திய பட்ஜெட்டில் இடம்பெறும் என எதிர்பார்க்கப்படுகிறது.

இந்நிலையில், தாக்கல் செய்யப்படவுள்ள மத்திய பட்ஜெட்டில் தமிழ்நாட்டு மக்களின் எதிர்பார்ப்புகள் நிறைவு செய்யப்படும் என நம்புகிறேன் என முதல்வர் ஸ்டாலின் தெரிவித்துள்ளார். மேலும், 3 ஆண்டுகளாக விடுவிக்கப்படாமல் உள்ள சென்னை மெட்ரோ ரயில் திட்டத்திற்கான நிதியை விடுவிக்கப்படும், கோவை, மதுரை மெட்ரோ ரயில் திட்டங்களுக்கான ஒப்புதல் வழங்கப்படும் என எதிர்பார்ப்பதாகவும் குறிப்பிட்டுள்ளார்.

தமிழக முதல்வர் ஸ்டாலின் வெளியிட்டுள்ள எக்ஸ் சமூக வலைதள பதிவில், "நாடாளுமன்றத்தில் தாக்கல் செய்யப்படவுள்ள பட்ஜெட்டில் மூன்று ஆண்டுகளாக விடுவிக்கப்படாமல் இருக்கும் சென்னை மெட்ரோ ரயில் திட்டத்திற்கான நிதியை விடுவிக்க வேண்டும்.

தாம்பரம் - செங்கல்பட்டு இடையே மேம்பால விரைவுச் சாலைத் திட்டத்திற்கான ஒப்புதல் வழங்க வேண்டும்.

பத்தாண்டுகளாக வருமான வரிச் சுமை குறைக்கப்படும் என்ற நடுத்தரக் குடும்பங்களின் எதிர்பார்ப்பை நிறைவேற்ற வேண்டும்.

கோவை மற்றும் மதுரை மெட்ரோ இரயில் திட்டங்களுக்கான ஒப்புதல் அளிக்க வேண்டும்.

தமிழ்நாட்டில் ஏற்கெனவே அறிவிக்கப்பட்டுள்ள மற்றும் புதிய ரயில்வே திட்டங்களை விரைந்து செயல்படுத்திடப் போதிய நிதி ஒதுக்கீடு செய்யவேண்டும்.

கிராமப்புற மற்றும் நகர்ப்புற வீட்டு வசதித் திட்டங்களின்கீழ் கட்டப்படும் வீடுகளுக்கான செலவு வரம்பை உயர்த்த வேண்டும்.

என்பது உள்ளிட்ட தமிழ்நாட்டு மக்களின் எதிர்பார்ப்புகளை ஒன்றிய அரசு நிறைவு செய்யும் என்று நம்புகிறேன்." எனத் தெரிவித்துள்ளார்.

English summary

Tamil Nadu Chief Minister Stalin has said that he expects the funds for the Chennai Metro Rail Project, which has not been released for 3 years, to be released in the Union Budget to be presented in the Parliament.