ராஜீவ் காந்தி கொலை வழக்கு: விடுதலையான முருகன் அடையாள அட்டை கேட்டு ஹைகோர்ட்டில் மனு

சென்னை: முன்னாள் பிரதமர் ராஜீவ் காந்தி கொலை வழக்கில் விடுவிக்கப்பட்டு முருகன் தனக்கு அடையாள அட்டை வழங்கக் கோரி சென்னை உயர் நீதிமன்றத்தில் மனுத்தாக்கல் செய்துள்ளார்.

இதுதொடர்பாக அவர் தாக்கல் செய்துள்ள மனுவில், லண்டனில் உள்ள தனது மகளுடன் சென்று வசிப்பதற்கு விசா எடுக்க விண்ணப்பிக்க போவதாகவும், அவ்வாறு விண்ணப்பிக்க வேண்டுமானால் அதற்கு புகைப்படத்துடன் கூடிய அடையாள அட்டை கட்டாயம் என தெரிவித்துள்ளார்.

எனவே தனக்கு உரிய அடையாள அட்டை வழங்கும்படி கடந்த ஜனவரி மாதம் மறுவாழ்வு இயக்குனரிடம் விண்ணப்பித்தும் அதன் மீது இன்னும் நடவடிக்கை எடுக்கப்படவில்லை என மனுவில் கூறியுள்ளார்.

எனவே அடையாள அட்டை வழங்க மறுவாழ்வு இயக்குனருக்கு உத்தரவிட வேண்டும் என மனுவில் கோரிக்கை வைத்துள்ளார்.

இந்த வழக்கு நீதிபதிகள் எம்.எஸ்.ரமேஷ் மற்றும் சுந்தர் மோகன் அமர்வில் விசாரணைக்கு வந்தபோது, இந்த வழக்கை விசாரிப்பதில் இருந்து விலகுவதாக நீதிபதி சுந்தர் மோகன் தெரிவித்தார். இதையடுத்து, முருகனின் வழக்கை வேறு அமர்வில் பட்டியலிடும் வகையில் தலைமை நீதிபதியின் ஒப்புதலை பெற பதிவுத்துறைக்கு உத்தரவிட்டுள்ளனர்.

English summary

Rajiv Gandhi Convict Murugan demands to give indentity card for him in Chennai HC.