டெல்லியில் முகாமிட்டுள்ள எடப்பாடி பழனிசாமி.. டக்கென திரௌபதி முர்முவை நேரில் சந்தித்தார்!

டெல்லி: குடியரசுத் தலைவர் தேர்தலில் வென்ற திரௌபதி முர்முவை நேரில் சந்தித்து எடப்பாடி பழனிசாமி வாழ்த்து தெரிவித்தார்.

நாட்டின் 14ஆவது குடியரசுத் தலைவராக இருக்கும் ராம்நாத் கோவிந்தின் பதவிக்காலம் நிறைவடையும் நிலையில், புதிய குடியரசுத் தலைவரைத் தேர்வு செய்ய ஜூலை 18ஆம் தேதி தேர்தல் நடத்தப்பட்டது.

இந்தத் தேர்தலில் பாஜக கூட்டணி சார்பில் திரௌபதி முர்முவும் எதிர்க்கட்சிகள் சார்பில் பொது வேட்பாளராக யஷ்வந்த் சின்ஹாவும் பொது வேட்பாளராகக் களமிறக்கப்பட்டனர்.

குடியரசுத் தலைவர் தேர்தல்

இந்தத் தேர்தலில் பதிவான வாக்குகள் நேற்று முன்தினம் எண்ணப்பட்டு முடிவுகள் அறிவிக்கப்பட்டன. மூன்றாம் சுற்றிலேயே 50%க்கும் அதிகமான வாக்குகளை அவர் பெற்றார். இதன் மூலம் நாட்டின் 15ஆவது குடியரசுத் தலைவர் என்ற சிறப்பை அவர் பெற்றார். இந்தியாவின் இளம் குடியரசுத் தலைவர் என்ற சிறப்பை பெற்ற அவர், முதல் பழங்குடியின குடியரசுத் தலைவர் என்ற சிறப்பையும் பெற்றார்.

வெற்றி

இதில் திரௌபதி முர்முவுக்கு எதிர்பார்த்ததைக் காட்டிலும் அதிக வாக்குகளைப் பெற்றார். மொத்தமாக பாஜக வேட்பாளர் திரௌபதி முர்முவுக்கு 6,76,803 மதிப்பிலான வாக்குகள் கிடைத்தன. அவரை எதிர்த்துப் போட்டியிட்ட எதிர்க்கட்சிகளின் பொது வேட்பாளரான யஷ்வந்த் சின்ஹாவுக்கு 3,80,177 வாக்குகள் மட்டுமே கிடைத்துள்ளன. பல மாநிலங்களில் எதிர்க்கட்சியைச் சேர்ந்த எம்பிக்கள் எம்எல்ஏக்களே திரௌபதி முர்முவுக்கு வாக்களித்து உள்ளனர்.

வாழ்த்து

திரௌபதி முர்மு திங்கள்கிழமை நாட்டின் 15ஆவது குடியரசுத் தலைவராகப் பொறுப்பு ஏற்க உள்ளார். நாட்டின் முதல் பழங்குடியின குடியரசுத் தலைவர் என்ற சிறப்பை பெறப்போகும் திரௌபதி முர்முவை பலரும் வாழ்த்தி வருகின்றனர். பிரதமர் நரேந்திர மோடி வெற்றி அறிவிக்கப்பட்ட உடனேயே நேரில் சந்தித்து வாழ்த்து தெரிவித்தார். முதல்வர் ஸ்டாலின் உள்ளிட்ட தலைவர்கள் ட்விட்டரில் வாழ்த்து தெரிவித்து இருந்தனர்.

எடப்பாடி பழனிசாமி நேரில் வாழ்த்து

இதற்கிடையே டெல்லி சென்றுள்ள தமிழ்நாடு சட்டமன்ற எதிர்க்கட்சித் தலைவரான எடப்பாடி பழனிசாமி குடியரசுத் தலைவர் தேர்தலில் வெற்றி பெற்ற திரௌபதி முர்முவை நேரில் சந்தித்து வாழ்த்து தெரிவித்தார். இந்த சந்திப்பின் போது அதிமுக மூத்த நிர்வாகிகளான ராஜ்யசபா உறுப்பினர் தம்பிதுரை, முன்னாள் அமைச்சர் எஸ்.பி.வேலுமணி ஆகியோர் உடன் இருந்தனர்.

நன்றி

மேலும், ராஜ்யசபா உறுப்பினர் என். சந்திரசேகர், முன்னாள் அமைச்சருமான தளவாய் சுந்தரம் ஆகியோரும் உடன் இருந்தனர். இந்தச் சந்திப்பின் போது, தனக்கு வாக்களித்த அதிமுக எம்பிக்கள் மற்றும் எம்எல்ஏக்களுக்கு திரௌபதி முர்மு நன்றி தெரிவித்துக் கொண்டார்.

English summary

Edappadi Palanisamy congratulated Draupadi Murmu for her presidential poll: (குடியரசுத் தலைவர் தேர்தலில் வென்ற திரௌபதி முர்முவை நேரில் சந்தித்து வாழ்த்திய எடப்பாடி பழனிசாமி) President election 2022 latest updates in tamil.