இனி 10 நிமிட டெலிவரி கிடையாது.. ஸ்விக்கி, ஜோமட்டோ, பிளிங்கிட்க்கு மத்திய அரசு அதிரடி உத்தரவு

டெல்லி: பொதுமக்களுக்கு ஆன்லைன் ஆர்டர்களை டெலிவரி செய்யும் நிறுவனங்களான ஸ்விக்கி, ஜோமட்டோ, பிளிங்கிட் உள்ளிட்ட நிறுவனங்கள் 10 நிமிட டெலிவரி என்பதை கைவிட வேண்டும் என்று மத்திய தொழிலாளர் நல அமைச்சகம் அதிரடியாக உத்தரவிட்டுள்ளது.

இப்போது வீட்டில் இருந்தபடியே பிடித்த உணவு முதல் வீட்டுக்கு தேவையான அனைத்து பொருட்களையும் ஆன்லைனிலேயே ஆர்டர் செய்து வாங்கி பயன்படுத்தும் பழக்கம் வந்துவிட்டது. ஒரு காலத்தில் நகரங்களில் மட்டுமே இருந்த இந்த சேவை இன்று கிராமம் வரை விரிவடைந்துவிட்டது.

ஸ்விக்கி, ஜோமட்டோ, பிளிங்கிட், ஜெப்டோ, அமேசான், பிளிப்கார்ட் என்று பல நிறுவனங்கள் இந்த துறையில் கால்பதித்து செயல்பட்டு வருகின்றன. நிறுவனங்கள் இடையே கடும் போட்டி உள்ளது.

இந்த போட்டியை சமாளிக்கவும், கஸ்டமர்களை தங்கள் பக்கம் இழுக்கவும் 10 நிமிட டெலிவரி என்ற முறையை வகுத்து செயல்படுத்தி வருகின்றன. அதாவது எங்களிடம் ஆர்டர் செய்தால் அடுத்த 10 நிமிடத்தில் டோர்டெலிவரி செய்யப்படும் என கூறி கஸ்டமர்களை நிறுவனங்கள் தங்கள் வசம் இழுக்கின்றன. இதனால் குறித்த நேரத்தில் டெலிவரி செய்ய ஊழியர்கள் சாலைகளில் வேகமாக டூவீலர்களில் செல்வதும், விபத்தில் சிக்குவதும் அடிக்கடி நடந்து வருகிறது.

இதையடுத்து பல்வேறு கோரிக்கைகளை வலியுறுத்தி கடந்த கிறிஸ்துமஸ் மற்றும் புத்தாண்டு தினத்தில் டெலிவரி ஊழியர்கள் வேலைநிறுத்த போராட்டத்தில் ஈடுபட்டனர். 10 நிமிட டெலிவரி என்பதை ரத்து செய்ய வேண்டும் என்பது உள்பட பல்வேறு கோரிக்கைகளை வலியுறுத்தி அவர்கள் போராட்டத்தில் ஈடுபட்டனர்.

இதன் தொடர்ச்சியாக தான் மத்திய தொழிலாளர் நலத்துறை அமைச்சர் மான்சுக் மாண்வடவியா டெலிவரி நிறுவன நிர்வாகிகளுடன் ஆலோசனை மேற்கொண்டார். ஸ்விக்கி, ஜோமட்டோ, பிளிங்கிட், ஜெப்டோ உள்பட பல்வேறு நிறுவனங்களை சேர்ந்தவர்கள் இதில் பங்கேற்றனர்.

இந்த சமயத்தில், ‛‛ஆன்லைனில் 10 நிமிட டெலிவரி என்ற விளம்பரங்களை நீக்கம் செய்ய வேண்டும். 10 நிமிடங்களில் ஆர்டர்கள் டெலிவரி செய்யப்படும் என்பது ஊழியர்களின் பாதுகாப்பை கேள்விக்குறியாக்குகிறது. இதனால் கைவிட வேண்டும்'' என்று உத்தரவிட்டார்.

இதனால் வரும் காலத்தில் 10 நிமிட டெலிவரி என்பது இருக்காது என்று கூறப்படுகிறது. முன்னதாக கடந்த கிறிஸ்துமஸ் மற்றும் புத்தாண்டு தினத்தில் பல்வேறு கோரிக்கையை வைத்து போராடிய டெலிவரி ஊழியர்களுக்கு ஸ்விக்கி, ஜோமட்டோ நிறுவனங்களில் டெலிவரிக்கான இன்செட்டிவ் தொகையை உயர்த்தி வழங்கியது.

இப்படியான சூழலில் தற்போது 10 நிமிட டெலிவரியை ரத்து செய்ய மத்திய தொழிலாளர் நலத்துறை அமைச்சர் மான்சுக் மாண்டவியா தெரிவித்து இருப்பது ஊழியர்களுக்கு ஹேப்பியை வழங்கி உள்ளது.

English summary

The Union Labour Ministry has issued a stern order stating that companies like Swiggy, Zomato, and Blinkit, which deliver online orders to the public, must abandon the 10-minute delivery service.