ஹரியானாவில் இமாலய வெற்றி.. அடித்து நொறுக்கும் காங்கிரஸ்.. பாஜக ரொம்ப மோசம்.. நியூஸ் 24 எக்ஸிட் போல்

சண்டிகர்: ஹரியானா மாநிலத்தில் இன்று ஒரே கட்டமாக வாக்குப்பதிவு நடந்து முடிந்த நிலையில், இப்போது எக்ஸிட் போல் முடிவுகள் வெளியாகியுள்ளது. இதில் நியூஸ் 24 நடத்திய எக்ஸிட் போல் முடிவுகளில் காங்கிரஸ் நிச்சயம் வென்று ஆட்சியைப் பிடிக்கும் எனத் தெரிவிக்கப்பட்டுள்ளது. அங்கு ஆளும் கட்சியாகத் தேர்தலை எதிர்கொண்ட பாஜக மோசமான தோல்வியைத் தழுவும் எனக் கூறப்பட்டுள்ளது.

ஹரியானா மாநிலத்தில் இப்போது நயாப் சிங் சைனி முதல்வராக இருக்கிறார். அங்குள்ள 90 இடங்களுக்கும் இன்று ஒரே கட்டமாக வாக்குப்பதிவு நடந்தது. அங்கு மாலை 5 மணி வரை சுமார் 61% வாக்குகள் பதிவாகியுள்ளது.

வெற்றி யாருக்கு: அங்குக் காங்கிரஸ் கட்சி இந்த முறை ஆட்சியைக் கைப்பற்ற வேண்டும் என்ற முனைப்பில் தேர்தலை எதிர்கொள்கிறது. இதற்கிடையே ஹரியானா மாநிலத்திற்கான நியூஸ் 24 எக்ஸிட் போல் சர்வே முடிவுகள் இப்போது வெளியாகியுள்ளது.

அதில் காங்கிரஸ் தனிப்பெரும்பான்மையுடன் நிச்சயம் ஆட்சியைப் பிடிக்கும் எனத் தெரிவிக்கப்பட்டுள்ளது. அதேநேரம் இப்போது ஆளும் கட்சியாகத் தேர்தலைச் சந்தித்த பாஜகவால் அதிகபட்சம் 32 இடங்களில் மட்டுமே வெல்ல முடியும் எனத் தெரிவிக்கப்பட்டுள்ளது.

கள சூழல் என்ன: ஹரியானாவில் மொத்தம் 90 இடங்கள் இருக்கும் நிலையில், அங்கு 46 இடங்களில் வெல்லும் கட்சியே ஆட்சியைப் பிடிக்கும். இந்த முறை அங்குக் காங்கிரஸ் 52- 64 இடங்களில் வென்று ஆட்சியைப் பிடிக்கும் என்று நியூஸ் 24 எக்ஸிட் போல் சர்வே தெரிவித்துள்ளது. மறுபுறம் பாஜகவால் 22-32 இடங்களில் மட்டுமே வெல்ல முடியும் எனத் தெரிவிக்கப்பட்டுள்ளது. இதர கட்சிகளால் அதிகபட்சம் 5 இடங்களில் வெல்ல முடியும் என்று இந்த சர்வேயில் கூறப்பட்டுள்ளது.

10 ஆண்டுகளுக்குப் பிறகு: தற்போது வரை வெளியான கிட்டதட்ட அனைத்து எக்ஸிட் போல் முடிவுகளில் பாஜக ஆட்சியை இழப்பது உறுதி என்றே தெரிவிக்கப்பட்டுள்ளது. காங்கிரஸ் அங்குப் பெரும்பான்மை பெற்று ஆட்சியைப் பிடிக்கும் என்று எக்ஸிட் போல்களில் கூறப்பட்டுள்ளது. தேர்தல் முடிவுகள் இதை ஒட்டியே அமைந்தால் காங்கிரஸ் சுமார் 10 ஆண்டுகளுக்குப் பிறகு அங்கு ஆட்சியைப் பிடிக்கும்.

பாஜக மீது கோபம் ஏன்: கடந்த லோக்சபா தேர்தலிலாவது ஹரியானாவில் பாஜக கணிசமான இடங்களில் (10 இடங்களில் போட்டியிட்டு 5இல் வெற்றி) வென்றது. ஆனால், இந்த முறை பாஜக நிலை அங்கு ரொம்பவே மோசமாகவே இருக்கிறது. மக்கள் தற்போதுள்ள ஹரியானா மாநில பாஜக அரசு மீது அதிருப்தியில் உள்ளதே இதற்கு முக்கிய காரணம். விவசாய போராட்டங்கள், அக்னி வீர், விளையாட்டு வீரர்கள் போராட்டத்தைக் கையாண்ட விதம் பாஜகவுக்குக் கெட்ட பெயரை வாங்கி கொடுத்துள்ளது.

மேலும், அங்கு வேலையின்மையும் இப்போது பெரிய பிரச்சினையாக மாறிவிட்டதாம். தேசிய தலைநகர் பகுதியில் உள்ள குருகிராம் உள்ளிட்ட பகுதிகளில் வேலை கிடைத்தாலும் ஹரியானாவின் இதர பகுதிகளில் வேலைவாய்ப்பின்மை அதிகமாகவே இருக்கிறது. இதனால் ஹரியானாவில் உள்ள இளைஞர்கள் அதிருப்தியடைந்துள்ளனர். தேர்தல் பிரச்சாரத்தில் காங்கிரஸ் கட்சியும் சரியாக இதை எல்லாம் முன்வைத்தே பிரச்சாரம் செய்தது. இதுவே காங்கிரஸ் கட்சி வெல்ல ஹரியானாவில் காரணமாக உள்ளதாக வல்லுநர்கள் குறிப்பிடுகிறார்கள்.

English summary

According to the News24 Exit Poll, Congress is set to win a majority over BJP in the Haryana Assembly Election 2024. Congress could secure 64 seats, leaving BJP behind.