நான் செய்த தவறுக்கு இதுதான் பிராயச்சித்தம்.. மேடையிலேயே திமுக எம்பி அப்துல்லா செய்த நெகிழ்ச்சி செயல்

புதுக்கோட்டை: நான் செய்த தவறுக்கு பிராயச்சித்தமாக என்ன செய்தேன் என்பதை புதுக்கோட்டை திமுக எம்பி எம்.எம். அப்துல்லா தனது ட்விட்டர் பக்கத்தில் தெரிவித்துள்ளார்.

இதுகுறித்து புதுக்கோட்ட எம்பி அப்துல்லா தனது பேஸ்புக் பக்கத்தில் கூறியிருப்பதாவது: புதுக்கோட்டை மாவட்டம் கோட்டைபட்டிணத்தில் உள்ள அரசு பெண்கள் உயர் நிலைப் பள்ளிக்கு எனது நாடாளுமன்ற உறுப்பினர் நிதியில் இருந்து சுமார் 44 லட்சம் செலவில் பள்ளிக் கட்டிடங்கள் கட்ட அடிக்கல் நாட்டும் நிகழ்விற்குச் சென்றிருந்தேன்.

பள்ளியின் ஆண்டு விழாவும் கூட! மாணவியர் மத்தியில் உரையாறும்படி தலைமை ஆசிரியர் கோரினார். சிறுபான்மைச் சமூகத்தில் இருந்தும் மீனவ சமூகத்தில் இருந்தும் பெருவாரியான குழந்தைகள் படிக்கும் பள்ளி அது. எனவே அதை மனதில் வைத்து "பெண் கல்விதான் சமூகத்தில் ஒடுக்கப்பட்டு இருக்கும் அவர்களுக்கு சமூக விடுதலையை அளிக்கும் என்று கூறி படித்து நீங்கள் எல்லாம் பெரும் பெரும் பொறுப்புகளுக்கு வர வேண்டும்" என உரையாற்றி அமர்ந்தேன்.

பேசி முடித்ததும் தலைமை ஆசிரியர் என்னிடம் "கடந்த ஆண்டு பத்தாம் வகுப்பு பொதுத் தேர்வில் நானூறு மதிப்பெண்களுக்கு மேல் பெற்ற 15 மாணவியருக்கு உங்கள் கையால் பரிசுகள் வழங்க வேண்டும்" என்று கோரினார். நானும் மிக்க மகிழ்வோடு சம்மதித்தேன். பரிசு பொருட்களாக சமையல் குக்கர், ஹாட் பாக்ஸ் ஆகியவற்றை வழங்கினார்கள்.

அத்தனை பேருக்கும் குடுத்து முடித்த பிறகு மீண்டும் மைக்கை கையில் எடுத்தேன்.. "சற்று முன்னர்தான் உங்களிடம் படிப்பு ஒன்றுதான் பெண்ணடிமைத் தனத்தில் இருந்து உங்களை விடுதலை செய்யும்.. அடுப்படி மறந்து நீங்கள் எல்லாம் பெரிய பெரிய அதிகாரிகளாக வர வேண்டும் எனப் பேசினேன்.. ஆனால் என் கையாலேயே பரிசு பொருட்களாக சட்டி பானைகளை உங்களுக்கு வழங்க வைத்து விட்டார்கள்.

அப்போதே மாட்டேன் என்று மறுத்தால் மேடை நாகரீகமாக இருக்காது.. எனவே அந்தப் பரிசுகளைக் குடுத்து நானும் அவர்களின் தப்புக்கு துணை போனேன்! அதற்கு பிராயச் சித்தமாக உங்கள் ஒவ்வொருவருக்கும் தலா ஆயிரம் ரூபாய் பரிசாகத் தருகிறேன்.. வந்து பெற்றுக் கொள்ளுங்கள்" என அறிவித்தேன். பெற்றுக் கொண்ட அந்தக் குழந்தைகளும் நானும் மகிழ்வோடு விழா முடிந்து திரும்பினோம். இவ்வாறு அப்துல்லா தனது ட்வீட்டில் தெரிவித்துள்ளார்.

English summary

Pudukottai DMK MP M.M. Abdulla presented school students Rs 1000 each those who get good marks.