களவீரரே! நக்கீரரே! சுதேசியே! பீஷ்மரே! கம்பீரமே!.. மு.க. அழகிரி பிறந்த நாள் போஸ்டர் ரவுண்ட் அப்!!

By Mathi

Published: Saturday, January 31, 2015, 10:03 [IST]

Subscribe to Oneindia Tamil

மதுரை: முன்னாள் மத்திய அமைச்சர் மு.க. அழகிரியின் 64வது பிறந்த நாள் மதுரையில் நேற்று வெகுவிமரிசையாக கொண்டாடப்பட்டது. வழக்கம் போல மு.க. அழகிரி ஆதரவாளர்கள் விதம் விதமான வாசகங்களுடன் போஸ்டர்களை அச்சடித்து அனைவரையும் அசத்தியுள்ளனர்.

முன்னாள் மத்திய அமைச்சர் மு.க.அழகிரி மதுரை டி.வி.எஸ். நகரில் உள்ள தனது வீட்டில் காலை 9 மணி அளவில் மனைவி, மகன், மருமகள் உள்ளிட்ட உறவினர்களுடன் கேக் வெட்டி தனது பிறந்த நாளை கொண்டாடினார். இதனைத் தொடர்ந்து வீட்டில் இருந்து பிறந்த நாள் விழா நடைபெற்ற முத்தையா மன்றம் வரை சுமார் 4 மணி கிலோ மீட்டர் வரை ஊர்வலமாக அவர் அழைத்து செல்லப்பட்டார். வழி நெடுக அவரது ஆதரவாளர்கள் மேள தாளத்துடன் வரவேற்பு அளித்தனர்.

போக்குவரத்து நெரிசல்

பெரியார் பேருந்து நிலையத்தில் முன்னாள் கவுன்சிலர் தம்பித்துரை தலைமையில் திருநங்கைகள் 10 பேர் ஆட்டம், பாட்டத்துடன் வரவேற்பு கொடுத்தனர். இதைத் தொடர்ந்து ஊர்வலமாக மண்டபம் வரை சாரட் வண்டியில் மு.க. அழகிரி அழைத்துச் செல்லப்பட்டார். இதனால் ஒட்டுமொத்தமாக மதுரை நகரமே பகல் முழுவதும் போக்குவரத்து நெரிசலில் சிக்கி பெருந்துயரத்தை அனுபவித்தது.

மட்டன் பிரியாணி விருந்து

மண்டபத்தில் ஆதரவாளர்கள் அவருக்கு பிறந்த நாள் வாழ்த்துக்களை தெரிவித்தனர். மு.க.அழகிரிக்கு கேடயம், வாள், கத்தி உள்ளிட்ட பல்வேறு பரிசுகளை கொடுத்து மகிழ்ந்தனர். மண்டபத்தில் பிறந்த நாள் விழாவுக்கு வந்திருந்தவர்களுக்கு மட்டன் பிரியாணி ஏற்பாடு செய்யப்பட்டிருந்தது.

தி.மு.க. நிர்வாகிகள்

தி.மு.க. விவசாய அணி மாநிலச் செயலரும், ராஜ்யசபா எம்.பி.யுமான கே.பி. ராமலிங்கம், முன்னாள் அமைச்சர் வ. முல்லைவேந்தன் ஆகியோர் அழகிரிக்கு வாழ்த்து தெரிவித்தனர். ஆனால், தி.மு.க. முக்கிய நிர்வாகிகள், மாவட்ட நிர்வாகிகள் யாரும் பிறந்தநாள் விழாவில் பங்கேற்கவில்லை.

மூன்றரை மணி நேர ஊர்வலம்

மு.க. அழகிரி வீட்டில் காலை 9.30 மணிக்கு தொடங்கிய வாகன ஊர்வலம், பிறந்த நாள் விழா நடைபெற்ற ராஜா முத்தையா மன்றத்தை பிற்பகல் 1 மணிக்கு அடைந்தது. இதனால் பகல் முழுவதும் மதுரையே முடங்கிப் போனது.