சுத்தமா சமைக்கணும்! சாம்பாரில் உப்பு இருக்கா? கையில் ஊற்றி ருசி பார்த்த கதிர் ஆனந்த் எம்.பி.!

வேலூர்: வேலூர் இ.எஸ்.ஐ மருத்துவமனையில் ஆய்வு செய்த திமுக நாடாளுமன்ற உறுப்பினர் கதிர் ஆனந்த், நோயாளிகளுக்கு வழங்கப்படும் உணவின் தரம் குறித்து பரிசோதித்தார்.

சுத்தமான பாத்திரங்களில் உணவு சமைக்கப்படுகிறதா என்பதை பார்வையிட்ட கதிர் ஆனந்த், சாப்பாடு மற்றும் சாம்பாரில் உப்பு, காரம், சரியாக உள்ளதா என்பது குறித்தும் அதனை சாப்பிட்டு பார்த்து ஆய்வு செய்தார்.

வேலூரில் உள்ள அரசு தொழிலாளர் ஈட்டுறுதி மருத்துவமனையை வேலூர் நாடாளுமன்ற உறுப்பினர் கதிர் ஆனந்த் ஆய்வு செய்தார் . அப்போது மருந்துகள் மாத்திரைகள் நோயாளிகளுக்கு முறையாக வழங்கபடுகிறதா என்று மருந்து பற்றாகுறை எதுவும் உள்ளதா எனவும் அங்கிருந்த மருத்துவர்களிடம் கேட்டறிந்தார்.

அதைத் தொடர்ந்து நோயாளிகளை சந்தித்த கதிர் ஆனந்த் உங்களுக்கு முறையாக சிகிச்சைகள் அளிக்கபடுகிறதா என கேட்டார். அடுத்ததாக நோயாளிகளுக்கு உணவு பரிமாறும் இடத்தை பார்வையிடச் சென்றதால், இதனை எதிர்பார்க்காத மருத்துவர்களும், ஊழியர்களும் அவரை பின் தொடர்ந்து சென்றனர்.

வாளி ஒன்றில் வைக்கப்பட்டிருந்த சாம்பாரை கலக்கிவிட்டு கரண்டியில் தனது கையில் ஊற்றி அதனை குடித்துப் பார்த்த கதிர் ஆனந்த், நோயாளிகளுக்கு கொடுக்கப்படும் உணவு என்பதால் தூய்மையில் சமரசமின்றி நடந்துகொள்ள வேண்டும் என உயர் மருத்துவ அலுவலர்களுக்கு அறிவுறுத்தினார்.

இந்த ஆய்வை முடித்துவிட்டு செய்தியாளர்களை சந்தித்த கதிர் ஆனந்த் எம்.பி., ''ஒன்றிய அரசின் கீழ் இயங்கி வரும் இ.எஸ்.ஐ மருத்துவமனையானது வேலூரில் முக்கியமான மருத்துவமனையாக இயங்கி வருகிறது. இந்த மருத்துவமனையில் மத்திய மாநில அரசுகள் குழு அமைத்து என்ன மேம்பாடுகளை செய்ய வேண்டுமென நாடாளுமன்ற உறுப்பினர் என்ற முறையில் நான் உட்பட பலர் அடங்கிய குழுவை அமைத்துள்ளன.''

''இந்த மருத்துவமனை தொழிலாளர்களுக்கு பெரும் உதவியாக உள்ளது. ஆனால் இடப்பற்றாக்குறை உள்ளது. இதற்காக ஐந்தரை ஏக்கர் நிலம் கேட்டுள்ளனர். அதற்கான பணிகளை துவங்கவுள்ளோம், இடமும் தேர்வு செய்ய உள்ளோம். விரைவில் இடம் தேர்வு செய்யப்படும், மத்திய அரசின் உதவியுடன் 100-படுக்கைகள் கொண்ட மருத்துவமனை கட்டப்படும்.''

English summary

DMK Member of Parliament Kathir Anand inspected the Vellore ESI Hospital and checked the quality of food provided to the patients.