டிரம்ப் இஸ் பேக்..சொந்தமாக ஒரு சமூக வலைத்தளம்.. அதிரடி திட்டங்கள்.. அதிபர் தேர்தலில் மீண்டும் போட்டி

Updated: Monday, March 22, 2021, 15:16 [IST]

Subscribe to Oneindia Tamil

வாஷிங்டன்: முன்னாள் அமெரிக்க அதிபர் டிரம்ப், தனக்கு என்று தனியாக ஒரு சமூக வலைத்தளத்தை உருவாக்கி ஆதரவாளருடன் தொடர்பில் இருக்கத் திட்டமிட்டுள்ளார்.

அமெரிக்காவில் கடந்த நவம்பர் 5ஆம் தேதி தேர்தல் நடைபெற்றது. இதில் அதிபர் டிரம்பை ஜனநாயகக் கட்சியின் ஜோ பைடன் தோற்கடித்தார். கடந்த 25 ஆண்டுகளில் அதிபர் ஒருவர் தேர்தலில் தோற்பது இதுவே முதல் முறையாகும்.

இருப்பினும், அதிபர் டிரம்ப் கடைசி வரை தனது தோல்வியை ஒப்புக் கொள்ளவில்லை. தேர்தலில் மிகப் பெரியளவில் மோசடி நடைபெற்றதாக அவர் தொடர்ந்து குற்றஞ்சாட்டினார்.

அமெரிக்க வன்முறை

இந்தாண்டு ஜனவரி 6ஆம் தேதி புதிய அதிபரை அதிகாரப்பூர்வமாகத் தேர்ந்தெடுக்கும் நிகழ்வு அமெரிக்க நாடாளுமன்றத்தில் நடைபெற்றது. அதை எதிர்த்து தலைநகரில் பேரணியும் நடத்தப்பட்டது. அதில் கலந்து கொண்டு டிரம்ப் வன்முறையைத் தூண்டும் வகையில் பேசினார். இதனால் டிரம்ப் ஆதரவாளர்கள் அமெரிக்கா நாடாளுமன்றத்தில் புகுந்து வன்முறையில் ஈடுபட்டனர். இதில் இரண்டு காவலர்கள் உள்ளிட்ட சிலர் உயிரிழந்தனர்.

டிரம்ப் கணக்குகள் முடக்கம்

டிரம்ப் தொடர்ந்து வன்முறையைத் தூண்டும் வகையிலேயே ட்வீட் செய்து கொண்டிருந்ததால் அவரது ட்விட்டர் கணக்கு முதலில் தற்காலிகமாக முடக்கப்பட்டது. பின்னர் விரைவிலேயே டிரம்பின் ட்விட்டர் பக்கத்தை நிரந்தமாக முடக்குவதாக ட்விட்டர் அறிவித்தது. அதைத்தொடர்ந்து பேஸ்புக், யூடியூப் போன்ற நிறுவனங்களும் இதேபோல டிரம்பிற்கு நிரந்தர தடை விதித்தது.

புதிய சமூக வலைத்தளம்

ட்விட்டர் கணக்கில் டிரம்ப் பயங்கர ஆக்டிவாக இருப்பார். பொதுவாகத் தனது ஆதரவாளர்களுடன் டிரம்ப் சமூக வலைத்தளங்களின் வழியிலேயே தொடர்பிலிருந்தார். இதனால் இந்தத் தடை டிரம்பின் கைகளைக் கட்டிப் போட்டுவிட்டது. ஜனவரி மாதம் புதிய அதிபர் பதவியேற்றது முதல் சைலென்ட் மோடிலேயே இருக்கும் டிரம்ப், விரைவில் தனக்கென புதிதாக ஒரு சமூக வலைத்தளத்தை உருவாக்கி வருவதாக தகவல் வெளியாகியுள்ளது.

மீண்டும் அதிபர் தேர்தலில் போட்டி

அதிபர் தேர்தலில் டிரம்பின் பிரசார குழு செய்தித்தொடர்பாளராக இருந்த ஜேசன் மில்லர், இன்னும் இரண்டு அல்லது மூன்று மாதங்களில் டிரம்ப் தனக்கு என்று தனியாக ஒரு சமூக வலைத்தளத்தை உருவாக்கவுள்ளார் என்றும் இது ஆட்டத்தின் போக்கையே மாற்றியமைக்கும் என்றும் அவர் தெரிவித்தார். 2024ஆம் ஆண்டில் நடைபெறும் அதிபர் தேர்தலில் டிரம்ப் மீண்டும் போட்டியிடவுள்ளதாக அவரது ஆதரவாளர்கள் கூறிவரும் நிலையில், இந்த அறிவிப்பு முக்கியமானதாகப் பார்க்கப்படுகிறது.