அரிசி கடத்தலில் பெண்கள்: கருணாநிதி வருத்த கவிதை

ஏழை, எளிய மக்களுக்கு ரேஷன் கடைகளில் குறைந்த விலைக்குத் தரப்படும் அரிசியை கடத்தும் செயலில் பெண்களே ஈடுபடுவது மிகுந்த வருத்தம் தருவதாக முதல்வர் கருணாநிதி கூறியுள்ளார்.

இதுகுறித்து கருணாநிதி வெளியிட்டுள்ள வேதனைக் கவிதை:

மகளிர் நலனை முன்னிட்டு மலிவு விலை அரிசி கொடுத்தால் - அதை
மகளிர் சிலரே கூட்டுச் சேர்ந்து கடத்தல் வேட்டை நடத்துவதோ?

தேட்டை போடும் கூட்டமொன்று இந்த தேசத்தில் இருக்கலாமா?
தேர்தல் அறிக்கை வாக்குறுதி; திமுக நிறைவேற்றிக் களிக்கும்போது; அதைத்

திருடிப் பிழைத்துத் திரவியம் குவிப்போர் திசை திருப்ப முனையலாமா?
தின்னக் கிடைத்த உணவில் மண்ணையள்ளிப் போடுவதுதான் நியாயமாகுமா?

எத்தனை உயிர்கள் வாழ்வதற்குப் பயன்படும் அரிசி
எத்தர்கள் கூட்டம் தின்று ஏப்பமிடுவதற்கோ; அடச்சீ!

அன்பும், கருணையும்தான், அம்மாவும் தாயும்; அன்னையுமென்பார்
அவர்களே அரிசி கடத்த ஆரம்பித்து விட்டால்;

அக்ரமச் செயல்களிலேதான் ஆணும், பெண்ணும் சமம் என்று
அடித்துப் பாட வருவான் புதிய பாரதி!

அதுவரையில் காத்திராமல்
அய்யாமாரே; அம்மாமாரே;-

அரிசி கடத்தல் விட்டொழிப்பீரே;
அல்லால் நல்லோர் பழிப்பாரே!

இவ்வாறு கூறியுள்ளார் கருணாநிதி.