திடீர் ஓய்வு- நெல்லை பல்கலைக்கழக ஊழியர் திடீர் மரணம்

நெல்லை: நீங்கள் ஓய்வு பெற்று விட்டீர்கள். எனவே வேலைக்கு வரத் தேவையில்லை என்று நெல்லை மனோன்மணியம் பல்கலைக்கழ நிர்வாகம் திடீரென கூறியதால் அதிர்ச்சி அடைந்த ஊழியர் மாரடைப்பால் மரணமடைந்தார். அவரது உடலை உறவினர்கள் பல்கலைக்கு எடுத்து வர முயன்றதால் பரபரப்பு ஏற்பட்டது.

நெல்லை மனோன்மணியம் பல்கலை கழகத்தில் உதவியாளராக பணியாற்றியவர் பிசசாண்டி (58). இவருக்கு மனைவி சிவசங்கரி (43), மகன் முருகானந்தம் (23), மகள் சுப்ரீயா (21) ஆகியோர் உள்ளனர்.

இந்நிலையில் இவருக்கு நேற்று காலை வீட்டில் இருந்தபோது திடீரென நெஞ்சுவலி ஏற்பட்டது. இதை தொடர்ந்து அவரது குடும்பத்தினர் மற்றும் உறவினர்கள் அவரை தனியார் மருத்துவமனையில் சிகிச்சைக்காக சேர்த்தனர். அங்கு பிச்சாண்டி சிகிக்சை பலனின்றி இறந்தார்.

உடனே அவரது உறவினர்கள் உடலை சொந்த ஊரான செங்கோட்டைக்கு எடுத்து வந்தனர். வரும் வழியில் பல்கலை வாளகத்திற்கு உடலைக் கொண்டு செல்ல முயன்றனர். உடல் ஏற்றிச் சென்ற வாகனம் பல்கலை கழக வளாகக கேட்டிலேயே நிறுத்தப்பட்டது.

பிச்சாண்டியின் உறவினர்கள் மட்டும் துணைவேந்தர் சபாபதி மோனை சந்தித்து, அவரது மரணம் குறித்து தெரிவித்தனர். பிச்சாண்டியின் குடும்பம் ஏழ்மையில் இருப்பதால் அவரது மகனுக்கு வேலை கொடுக்க வேண்டும் என கேட்டுக் கொண்டனர்.

உடனே பிச்சாண்டியின் மகனுக்கு வேலை கொடுப்பதாக துணைவேந்தர் உறுதியளித்தார். இதனை தொடர்ந்து பிச்சாண்டியின் உடலை எடுத்து கொண்டு அவரது உறவினர்கள் செங்கோட்டைக்கு வந்தனர்.

என்ன காரணம்...?

பல்கலைக்கழக வாட்ச்மேனாக பிச்சாண்டி பணியாற்றி வந்தார். கடந்த மூன்று மாதங்களுக்கு முன் அவருக்கு உதவியாளர் பதவி உயர்வு அளிக்கப்பட்டது.

வாட்சமேனாக பணியாற்றுபவர்களுக்கு ஓய்வு பெறும் வயது 60, உதவியாளராக பணியாற்றுபவர்களுக்கு வயது 58. இந்த நிலையில் பிச்சாண்டிக்கு 58 வயது ஆகி விட்டதால், நீங்கள் ஓய்வு பெற்று விட்டீர்கள், எனவே பணிக்கு வரத் தேவையில்லை என்று பல்கலைக்கழக அதிகாரிகள் கூறியுள்ளனர்.

திடீரென இப்படிக் கூறியதால் அதிர்ச்சி அடைந்து பிச்சாண்டி மரணமடைந்தார் என்று தெரிகிறது.

இறந்த பிச்சாண்டியன் உடல் இன்று காலை 10 மணிக்கு அடக்கம் செய்யப்பட்டது.