அழைக்கிறார் நரேந்திர மோடி.. தவிர்க்கிறார் ராகுல் காந்தி!

By Chakra

Published: Wednesday, September 12, 2012, 13:04 [IST]

Subscribe to Oneindia Tamil

டெல்லி: அடுத்த ஆண்டு நடக்கவுள்ள குஜராத் சட்டமன்றத் தேர்தலுக்கான பிரச்சாரத்தை நேற்று முதல் தொடங்கிவிட்டார் முதல்வர் நரேந்திர மோடி.

தனக்கு எதிராக ராகுல் காந்தியை காங்கிரஸ் களமிறக்க வேண்டும் என்பது மோடியின் ஆசை. இதன்மூலம் தனது தேசிய அளவில் அதிக முக்கியத்துவம் கிடைக்கும் என்பது அவரது பிளான். இது 2014ம் ஆண்டு நடக்கும் நாடாளுமன்றத் தேர்தலில் தனது பிரதமர் கனவுக்கு உதவியாக இருக்கும் என்று நினைக்கிறார் மோடி.

ஆனால், அந்த வேலையை மட்டும் செய்துவிடவே கூடாது என்று மிக ஜாக்கிரதையாக உள்ளது காங்கிரஸ். தலைகீழாக நின்றாலும் குஜராத்தில் மோடியை தோற்கடிக்க முடியாது என்று நிச்சயமாக நம்பும் காங்கிரஸ், அந்த மாநிலத்தின் சட்டமன்றத் தேர்தல் களத்தில் ராகுல் காந்தியை இறக்கிவிட்டு முகத்தில் கரி பூசிக் கொள்ளத் தயாராக இல்லை.

ஏற்கனவே உத்தரப் பிரதேசத்தில் சமீபத்திய சட்டமன்றத் தேர்தலில் சமாஜ்வாடி கட்சித் தலைவர் அகிலேஷ் யாதவுக்கு எதிராக களமிறங்கி நன்றாக வாங்கிக் கட்டிக் கொண்டார் ராகுல் காந்தி. அங்காவது காங்கிரசுக்கு கொஞ்ச நஞ்சமாவது நம்பிக்கை இருந்தது.

ஆனால், குஜராத் முழுக்க முழுக்க தனிக்கதை. அங்கு நரேந்திர மோடி 3வது முறையாக முதல்வராவதைத் தடுக்க பெரிய சக்தி ஏதும் இல்லை. அவருடன் கட்சியில் இருந்து தனிக் கட்சி தொடங்கிவிட்ட முன்னாள் முதல்வர் கேசுபாய் படேல் தான் கொஞ்சமாவது ஓட்டைப் பிரித்து தங்களை கரையேற்ற வேண்டும் என்ற நிலையில் உள்ளது காங்கிரஸ்.

இதனால், நரேந்திர மோடி என்னதான் கேலி செய்தாலும், வம்புக்கு இழுத்தாலும் ராகுல் காந்தியை குஜராத் பிரச்சாரத்தில் முன் நிறுத்தி அசிங்கப்பட்டுவிடக் கூடாது என்று முடிவெடுத்துவிட்டது காங்கிரஸ்.

அந்த மாநிலத்தில் பிரச்சார வேலையை இரண்டாம் மட்டத் தலைவர்கள், மாநிலத் தலைவர்களிடம் விட்டுவிட்டு, சும்மா பேருக்காக சோனியா, ராகுல் காந்தி பிரச்சாரத்துக்குப் போய் வரப் போகிறார்கள் என்கிறார்கள்.

இதன்மூலம் குஜராத்தில் தோற்றாலும் அதற்கான பழி ராகுல் மீது விழாது. இது 2014ம் ஆண்டு மக்களவைத் தேர்தலில் காங்கிரஸ் சார்பிலான பிரதமர் வேட்பாளராக ராகுலை களமிறக்க செளகரியமாக இருக்கும் என்று காங்கிரஸ் கருதுகிறது.

ஆனால், தன்னுடன் குஜராத்தில் நேரடியாக மோதி ராகுல் தோற்க வேண்டும், இது மக்களவைத் தேர்தலில் (பிரதமர் கனவில் இருப்பதால்) ராகுலை எதிர்த்து நிற்க உதவியாக இருக்கும் என்று மோடி கருதுகிறார்.

ஆனால், குஜராத்தில் சில தொகுதிகளில் தவிர ராகுல் காந்தி முழுக்க முழுக்க பிரச்சாரத்தில் இறங்கவே போவதில்லை என்கிறார்கள்.

இதுவல்லவோ பைட்!

Published On September 12, 2012