அணு உலையை மூடக்கோரி 4 இடங்களில் நாளை முற்றுகை - 4000 போலீஸ் குவிப்பு

வள்ளியூர்: அணு உலையை மூடக்கோரி கூடங்குளம் போராட்ட குழுவினர் நாளை 4 இடங்களில் முற்றுகை போராட்டத்தில் ஈடுபடுகின்றனர். இதையொட்டி 4 ஆயிரம் போலீசார் பாதுகாப்புக்காக குவிக்கப்பட்டுள்ளனர்.

நெல்லை மாவட்டம் கூடங்குளம் அணு மின் நிலையத்தில் உள்ள முதல் அணு உலையில் ஏற்பட்ட கசிவு குறித்தும், மத்திய அமைச்சர் நாராயணசாமியின் முன்னுக்கு பின் முரணான அறிக்கையால் ஏற்பட்ட குழப்பங்கள் குறித்தும் மத்திய அரசு வெள்ளை அறிக்கை வெளியிட வேண்டும் என்று போராட்டக்குழு கோரி வருகிறது. ஆனால் இதுவரை அரசு வெள்ளை அறிக்கை குறித்து பதில் இல்லை.

இதனை கண்டித்து தூத்துக்குடி துறைமுகம், கன்னியாகுமரி பூம்புகார் கப்பல் போக்குவரத்து கழகம், விவேகானந்தர் பாறை மற்றும் கூடங்குளம் அணு உலை ஆகிய 4 இடங்களில் கடந்த பிப் 15ம் தேதி முற்றுகை போராட்டம் நடத்தப்படும் என்று போராட்டக்குழுவினர் அறிவித்திருந்தனர்.

இதில் தூத்துக்குடி துறைமுகம் மற்றும் கூடங்குளம் அணு உலையை கடல் வழியாகவும், தரை வழியாகவும் முற்றுகை போராட்டம் நடத்தப்படும் என்று அறிவிக்கப்பட்டது. இந்நிலையில் கடந்த 11ம் தேதி வங்க கடலில் ஏற்பட்ட சூறைகாற்றால் படகுகள் பழுதானதால் இந்த போராட்டம் பிப் 27ம் தேதி ஓத்தி வைக்கப்பட்டது. அன்றைய தினம் கன்னியாகுமரி பகவதி அம்மன் கோவில் கும்பாபிஷேக விழா நடந்ததால் பிப் 27ம் தேதி நடைபெற இருந்த போராட்டமும் ஓத்தி வைக்கப்பட்டது. பின்னர் இந்த முற்றுகை போராட்டம் மார்ச் 11ம் தேதி நடக்கும் என்று போராட்டகுழு ஓருங்கிணைப்பாளர் அறிவித்திருந்தார்.

இதையொட்டி நாளை 4 இடங்களில் முற்றுகை போராட்டம் நடக்கிறது. இதனால் இந்த 4 பகுதிகளிலும் பதற்றம் நிலவி வருகிறது. இதையடுத்து ஏற்கனவே கூடங்குளம் அணு உலை பாதுகாப்பு பணியில் இருந்த 1500 போலீசாரும், நெல்லை, தூத்துக்குடி, கன்னியாகுமரி, மதுரை, விருதுநகர், தேனி, ராமநாதபுரம், திண்டுக்கல், சிவகங்கை ஆகிய மாவட்டங்களிலிருந்து 2500 போலீசார் என மொத்தம் 4 ஆயிரம் போலீசார் நெல்லை சரக டிஐஜி சுமித் சரண் தலைமையில் பாதுகாப்பு பணியில் ஈடுபடுகின்றனர்.

English summary

Anti KKNPP committee is all set to stage siege protest tomorrow against the nuke power plant.