இந்திய விமானப்படைத் தளபதியின் சீன பயணம் திடீர் ரத்து: மத்திய அரசு அதிரடி

டெல்லி: சீனாவுக்கு செல்ல இருந்த இந்திய விமானப் படைத் தளபதி ஏர் சீப் மார்ஷல் என்.ஏ.கே. பிரவுனியின் பயணத்தை மத்திய அரசு திடீரென ரத்து செய்துவிட்டது.

எல்லைப் பகுதியில் சீன ராணுவத்தின் ஊடுருவல்கள் அதிகரித்து வரும் நிலையில், அந்த நாட்டுக்கு நமது விமானப் படைத் தலைவர் நல்லெண்ணப் பயணம் மேற்கொள்ள வேண்டிய அவசியமில்லை என்று இந்தியா கருதுவதாகத் தெரிகிறது.

முன்னதாக பிரவுனியை தனது நாட்டுக்கு வருமாறு சீன அரசு அழைப்பு விடுத்திருந்தது. ஆனால், பிரவுனி அங்கு செல்வதற்கு முன் சீனாவில் இருந்து முப்படைத் தலைவர்களில் ஒருவர் இந்தியாவுக்கு வரட்டும் என்று மத்திய அரசு கருதுவதாகத் தெரிகிறது.

அதே போல இந்திய ராணுவத் தளபதி பிக்ரம் சிங் வரும் நவம்பரில் சீனா செல்ல உள்ளார். சீனா-இந்தியா கூட்டு ராணுவப் பயிற்சிக்காக அவர் செல்கிறார். அவரது பயணத்தில் எந்த மாற்றமும் இல்லை என்று மத்திய அரசு வட்டாரங்கள் தெரிவிக்கின்றன.

அதே போல பிரதமர் மன்மோகன் சிங்கும் இந்த ஆண்டிலேயே சீனா செல்ல இருக்கிறார் என்பதும் குறிப்பிடத்தக்கது.

English summary

India has rejected Air Chief Marshal NAK Browne's proposed visit to China, a move seen as New Delhi's bid to avoid a diplomatic overdrive at a time it is worried about increased Chinese aggression at the Line of Actual Control. The air chief, the seniormost military commander across the services, was invited by China for a visit this month.