டிடிவி தினகரன் ஓவர்.. "நிழலை" வைத்து வேகமாக காய் நகர்த்தும் ஓபிஎஸ்.. அடுத்தது என்ன?

Updated: Monday, August 1, 2022, 11:58 [IST]

Subscribe to Oneindia Tamil

சென்னை: ஓபிஎஸ் ஆதரவாளர்கள் தரப்பில் டிடிவி தினகரனை சந்தித்துள்ள நிலையில், அவரின் அடுக்கட்ட நடவடிக்கைகள் என்னவாக இருக்கும் என்ற எதிர்பார்ப்பு ஏற்பட்டுள்ளது.

அதிமுகவில் ஒற்றைத் தலைமை விவகாரம் தொடர்ந்து உச்சத்திலேயே இருக்கும் சூழலில், கடந்த 11ம் தேதி நடைபெற்ற பொதுக்குழு கூட்டத்தில் இடைக்கால பொதுச்செயலாளராக எடப்பாடி பழனிசாமி தேர்ந்தெடுக்கப்பட்டார். அதனைத்தொடர்ந்து ஓபிஎஸ் மற்றும் அவரது ஆதரவாளர்களை நீக்கியதோடு, அவர்கள் வகித்து வந்த பதவிகளுக்கும் புதிய நிர்வாகிகளை அறிவித்தார்.

ஆனால் மறுபக்கம் அதிமுக ஒருங்கிணைப்பாளர் நான் தான் என ஓ.பன்னீர் செல்வம், எடப்பாடி பழனிசாமி மற்றும் அவரது ஆதரவாளர்களை கட்சியில் இருந்து நீக்கினார். தற்போது இந்த விவகாரம் தேர்தல் ஆணையம் மற்றும் நீதிமன்றத்தில் இருக்கிறது. இதனால் எடப்பாடி பழனிசாமி தரப்பு பெரிய ஆர்ப்பாட்டமின்றி இருக்கிறது.

டெல்லி மேலிடம்

ஆனால் ஓபிஎஸ் தரப்பில் பொதுக்குழு முதல் அதிமுக தலைமை அலுவலகம் வரை பல்வேறு விவகாரங்களிலும் தோல்வியையே சந்தித்துள்ளது. அதனால் அடுத்தடுத்த சந்திப்புகள், ஆலோசனைகள் என ஓபிஎஸ் தரப்பு பரபரப்பாக இயங்கி வருகிறது. குறிப்பாக டெல்லி மேலிடத்தின் ஆதரவை பெறுவதில் ஓ.பன்னீர் செல்வம் பல்வேறு நடவடிக்கைகளை ஈடுபட்டு வருகிறார். இதற்காக அண்மையில் பாஜகவின் எஸ்.வி.சேகர் உள்ளிட்ட சில நிர்வாகிகளை சந்தித்துள்ளார்.

சையது கான் விவகாரம்

அதேபோல் நேற்று தேனி சென்ற அமமுக பொதுச்செயலாளர் டிடிவி தினகரனை ஓபிஎஸ் ஆதரவாளரான சையது கான் சந்தித்து உற்சாக வரவேற்பளித்தார். இதனைத்தொடர்ந்து நீண்ட நாட்களுக்கு பின் சொந்த ஊர் சென்ற ஓ.பன்னீர் செல்வத்தை, சையது கான் வரவேற்றார். இருவரும் நீண்ட நேரம் ஆலோசனை மேற்கொண்டதாக கூறப்படுகிறது. இதனால் டிடிவி தினகரன் - ஓபிஎஸ் விரைவில் சந்திக்க வாய்ப்பு இருப்பதாக தகவல் வெளியாகியுள்ளது.

ஓபிஎஸ் மீது அனுதாபம்

அதேபோல் சசிகலா மற்றும் டிடிவி தினகரன் ஆகியோர் மீண்டும் அரசியலில் தீவிரமாக ஈடுபட்டு வருகின்றனர். சுற்றுப்பயணம், மாவட்ட செயல் வீரர்கள் கூட்டன் என அடுத்தடுத்த நடவடிக்கைகளில் ஈடுபட்டு வருகின்றனர். சசிகலா தரப்பில் அதிமுக கட்சியை ஒன்றாக இணைக்க வேண்டும். அனைவரும் சேர்ந்து செயல்பட வேண்டும் என்று பேசி வருகிறார். ஆனால் டிடிவி தினகரன், ஓபிஎஸ்-க்கு ஆதரவாகவும், எடப்பாடி பழனிசாமிக்கு எதிராகவும் நிலைப்பாடு எடுத்துள்ளார்.

விரைவில் சந்திப்பு

இந்த சூழலில் ஓ.பன்னீர் செல்வத்தின் மகனும், மக்களவை உறுப்பினருமான ஓ.பி.ரவீந்தரநாத், இதுவரை ஓபிஎஸ் - டிடிவி தினகரன் சந்திப்பு நடக்கவில்லை. ஆனால் இனிமேல் சந்திப்பார்களா என்று சொல்ல முடியாது. தொண்டர்கள் நினைப்பது நடக்கும் என்று தெரிவித்துள்ளார். இதனால் விரைவில் ஓபிஎஸ் ஆதரவாளர்கள் சசிகலா மற்றும் டிடிவி தினகரன் ஆகியோர் தனித்தனியாக சந்திப்பார்கள் என்று எதிர்பார்க்கப்படுகிறது.