அதிமுக சாதி கட்சியா? அழுத்தி சொன்ன சசிகலாவை படபடவென விமர்சித்த எடப்பாடி பழனிச்சாமி

Updated: Wednesday, June 19, 2024, 18:20 [IST]

Subscribe to Oneindia Tamil

தஞ்சாவூர்: அதிமுக சாதி கட்சியாக மாறுவதாக சசிகலா குற்றம்சாட்டிய நிலையில் அதனை எடப்பாடி பழனிச்சாமி முற்றிலுமாக மறுத்துள்ளார். அதோடு அந்த குற்றச்சாட்டை கூறிய சசிகலாவை அவர் கடுமையாக விமர்சனம் செய்துள்ளார்.

கடந்த 2 நாட்களுக்கு முன்பு சென்னை போயஸ் கார்டன் இல்லத்தில் சசிகலா பத்திரிகையாளர்களை சந்தித்தார். இந்த வேளையில் அவர் அதிமுக பொதுச்செயலாளர் எடப்பாடி பழனிச்சாமியை கடுமையாக விமர்சனம் செய்தார்.

Edappadi palaniswami admk sasikala politics

சசிகலா கூறுகையில், ‛‛ அதிமுக என்பது குறிப்பிட்ட சாதி கட்சியாக மாறி வருகிறது. அதிமுக அழிவதாக யாரும் நினைக்க வேண்டாம். விரைவில் என்ட்ரி கொடுக்கிறேன்'' என்று தெரிவித்தார்.

இந்நிலையில் தான் தஞ்சாவூர், நாகப்பட்டினம் மாவட்டத்தில் கட்சி நிர்வாகிகளின் வீட்டில் நடந்த திருமண விழாவில் இன்று எடப்பாடி பழனிச்சாமி பங்கேற்றார். அதன்பிறகு தஞ்சாவூரில் உள்ள தனியார் ஓட்டலில் அவர் பத்திரிகையாளர்களை சந்தித்தார். இந்த வேளையில் பத்திரிகையாளர்களின் பல்வேறு கேள்விகளுக்கு அவர் பதிலளித்தார். இந்த வேளையில், ‛‛அதிமுக சாதிக்கட்சியாக மாறிவிட்டதாகவுகம், விரைவில் என்ட்ரி கொடுப்பதாகவும் சசிகலா கூறுகிறாரே?'' என்ற கேள்வி முன்வைக்கப்பட்டது.

அதற்கு எடப்பாடி பழனிச்சாமி, ‛‛எந்த அடிப்படையில் அவர் சொல்கிறார் என்று நீங்கள் தான் கேட்க வேண்டும். அதிமுகவில் ஜெயலலிதா இருந்தபோது பதவி கொடுக்கப்பட்டவர்களுக்கு தான் இப்போதும் பதவி வழங்கப்பட்டுள்ளது. எங்கள் கட்சியின் எல்லா சாதியினரும் உள்ளனர். இஸ்லாமியர் அவைத்தலைவராக உள்ளார். அதிமுக என்பது சாதி, மதத்துக்கு அப்பாற்பட்ட கட்சி.

ஏதாவது குறை சொல்ல வேண்டும் என்பதற்காக அவர்கள் அப்படி சொல்கிறார். அதிமுகவில் யாரும் சாதி பார்ப்பது இல்லை. கட்சியை காப்பாற்றுவேன் என்று சசிகலா கூறுவது 3 ஆண்டுகள் வேலைக்கு செல்லாமல் திடீரென வேலைக்கு செல்வது போல் உள்ளது. 2021ல் அரசியல் ஓய்வு எனக்கூறிய சசிகலா இப்போது ஏன் வருகிறார்'' என பதில் கேள்வி எழுப்பினார்.

அடுத்ததாக, ‛‛அதிமுகவில் அடுத்தடுத்த சரிவுகளை சரிசெய்வதற்கான திட்டம் என்பது ஏதேனும் உள்ளதா?'' என்ற கேள்வி கேட்கப்பட்டது. அதற்கு எடப்பாடி பழனிச்சாமி, ‛‛எதை சரிவு என்று கூறுகிறீர்கள். தேர்தலில் தோல்வியடையாத கட்சி இருக்கிறதா? 1991ல் திமுகவுக்கு 2 எம்எல்ஏக்கள் தான் வந்தனர். 2014ல் ஒரு எம்பி கூட இல்லை. வெற்றி தோல்வி மாறி மாறி வரும். 2019ல் அதிமுக பலமான கூட்டணி அமைத்தது. அப்போது 19 சதவீத ஓட்டு கிடைத்தது. இப்போது கூட்டணி இல்லாமல் 20 சதவீத ஓட்டு கிடைத்துள்ளது. எங்களின் வளர்ச்சி ஒரு சதவீதம்'' என்றார்.