அதிமுகவுடன் அன்புமணி கூட்டணி பேசியது சட்ட விரோதம்.. எனக்கு மட்டுமே உரிமை.. எகிறி அடிக்கும் ராமதாஸ்

Updated: Sunday, January 11, 2026, 16:09 [IST]

Subscribe to Oneindia Tamil

சென்னை: அதிமுக கூட்டணியில், பாமக இணைந்தது, தொகுதி பங்கீடும் முடிந்துவிட்டது என்று எடப்பாடி பழனிசாமியும், அன்புமணியும் கூட்டாக கடந்த 7 ஆம் தேதி அறிவித்த நிலையில், ராமதாஸ் தேர்தல் ஆணையத்திற்கு கடிதம் ஒன்றை எழுதியுள்ளார். அதில், அன்புமணி பாமக சார்பாக கூட்டணி பேச்சு நடத்தியது சட்ட விரோதம் என்றும் அவர் மீது நடவடிக்கை எடுக்க வேண்டியும் கூறியுள்ளார்.

பாட்டாளி மக்கள் கட்சியில் தந்தை ராமதாஸ்க்கும் - மகன் அன்புமணிக்கும் இடையே மோதல் வலுத்துள்ளது. கட்சிக்கு நானே தலைவர் இருவருமே உரிமை கோரி வருகிறார்கள். அதேநேரத்தில் தேர்தல் ஆணைய ஆவணங்களின் படி, பாமக தங்கள் இருப்பதாக அன்புமணி தரப்பு கூறி வருகிறது. ஆனால், இதனை ராமதாஸ் தரப்பு மறுத்து வருகிறது.

Anbumani Alliance Talks with AIADMK Were Illegal Ramadoss Writes to Election Commission

சட்டமன்ற தேர்தல் ஓரிரு மாதங்களில் நடைபெற உள்ள நிலையில், பாமகவில் ஏற்பட்டுள்ள இந்த மோதல் அரசியல் வட்டாரத்தில் பரபரப்பை ஏற்படுத்தியுள்ளது. இத்தகைய சூழலில், அன்புமணி அண்மையில் அதிமுக பொதுச்செயலாளர் எடப்பாடி பழனிசாமியை சந்தித்தார். இந்த சந்திப்பிக்கு பிறகு அதிமுகவும் பாமகவும் கூட்டணி அமைத்துள்ளதாக அறிவிக்கப்பட்டது. இது ராமதாஸ் தரப்புக்கு கடும் அதிர்ச்சியை கொடுத்தது.

ராமதாஸ் அடுத்த கட்டமாக என்ன மாதிரியான நடவடிக்கை எடுக்கப்போகிறார் என்ற எதிர்பார்ப்பு அரசியல் வட்டாரத்தில் நிலவும் நிலையில், இன்று தேர்தல் ஆணையத்திற்கு ராமதாஸ் பரபரப்பு கடிதம் ஒன்றை எழுதியுள்ளார். அந்தக் கடிதத்தில், அன்புமணி மீது நடவடிக்கை எடுக்க வேண்டும் என்று ராமதாஸ் கோரியுள்ளார்.

பாமக பெயரை சட்ட விரோதமாக அன்புமணி பயன்படுத்துவதாகவும், அதிமுகவுடன் அன்புமணி நடத்திய பேச்சுவார்த்தை சட்ட விரோதமானது என்றும் ராமதாஸ் கூறியுள்ளார். மேலும், தேர்தல் கூட்டணி தொடர்பாக பேச்சுவார்த்தை நடத்த எனக்கு மட்டுமே உரிமை உள்ளது என்று கூறியுள்ள ராமதாஸ், அன்புமணி மீது நடவடிக்கை எடுக்க வேண்டும் தனது கடிதத்தில் வலியுறுத்தியுள்ளார்.