‘திகில்’ கிளப்பும் அன்புஜோதி ஆசிரமம்.. மேட்டரை கையில் எடுத்த அண்ணாமலை.. அமித்ஷாவுக்கு பறந்த கோரிக்கை

திமுக அரசு மீது குற்றம்சாட்டி அமித்ஷாவுக்கு அண்ணாமலை கடிதம் அனுப்பி இருக்கிறார்.

Published: Saturday, February 18, 2023, 19:02 [IST]

Subscribe to Oneindia Tamil

சென்னை : அன்புஜோதி ஆசிரமம் விவகாரம் தொடர்பாக சிபிஐ விசாரணைக்கு உத்தரவிடக் கோரி தமிழ்நாடு பாஜக தலைவர் அண்ணாமலை, மத்திய உள்துறை அமைச்சர் அமித்ஷாவுக்கு கடிதம் எழுதியுள்ளார்.

விழுப்புரம் மாவட்டம் விக்கிரவாண்டி அருகே குண்டலபுலியூர் கிராமத்தில் அன்பு ஜோதி என்ற பெயரில் ஆசிரமம் ஒன்று இயங்கி வந்தது. அங்கு பெண்களுக்கு பாலியல் பலாத்காரம் உள்ளிட்ட பல்வேறு கொடுமைகள் நடந்து வந்துள்ளது அம்பலமாகி உள்ளது.

அந்த காப்பகத்தில் பலாத்காரத்திற்கு இணங்காத பெண்களை குரங்குகளை விட்டு கடிக்கவிட்டதாகவும் அதிர்ச்சி தகவல்கள் வெளியாகியுள்ளன. இதையடுத்து இந்த ஆசிரமம் பூட்டி சீல் வைக்கப்பட்டுள்ளது.

அன்புஜோதி ஆசிரமத்தில் கொடூரம்

விழுப்புரம் மாவட்டத்தில் செயல்பட்டு வந்த அன்புஜோதி இல்ல ஆதரவற்றோர் மற்றும் மனநல காப்பகத்தில் தங்க வைக்கப்பட்டிருந்த முதியோர்கள் அடித்து துன்புறுத்தப் பட்டதாகவும், பெண்கள் பாலியல் வன்கொடுமைக்கு ஆளாக்கப்பட்டதாகவும் உள்ளிட்ட பல்வேறு அதிர்ச்சிகர்மான புகார்கள் வெளியாகின. இது தொடர்பாக 5 வழக்குகள் பதிவு செய்யப்பட்டு 6 பேர் கைது செய்யப்பட்ட நிலையில், சிபிசிஐடி விசாரணைக்கு மாற்றி தமிழ்நாடு காவல்துறை டிஜிபி சைலேந்திரபாபு உத்தரவிட்டுள்ளார்.

அண்ணாமலை கடிதம்

இந்நிலையில், இதுதொடர்பாக தமிழ்நாடு பாஜக தலைவர் அண்ணாமலை மத்திய உள்துறை அமைச்சர் அமித்ஷாவுக்கு கடிதம் எழுதியுள்ளார். அந்தக் கடிதத்தில், "தமிழ்நாட்டில் பல வாக்குறுதிகளை அளித்து ஆட்சிக்கு வந்த திமுக, அந்த வாக்குறுதியை நிறைவேற்றவில்லை. தமிழ்நாட்டில் திமுக ஆட்சிக்கு வந்த பிறகு சட்டம், ஒழுங்கு சீர்குலைந்து போயுள்ளது. கிருஷ்ணகிரி மாவட்டத்தில் ராணுவ வீரர் அடித்துக் கொல்லப்பட்ட வழக்கில் திமுக கவுன்சிலர் சம்பந்தப்பட்டுள்ளார்.

உடல் உறுப்புகளுக்காக

விழுப்புரம் அன்புஜோதி ஆசிரமத்தில் இருந்தவர்கள் உடல் உறுப்புகளுக்காக கடத்தப்பட்டிருக்கலாம் என சந்தேகம் எழுகிறது. பலர் காணாமல் போயுள்ளனர். இந்த ஆசிரமத்தில் இருந்து ஜபருல்லா என்பவர் காணாமல் போயுள்ளர். விசாரணையில் அவருடன் 52 பேர் பெங்களுரு ஆசிரமத்திற்கு மாற்றப்பட்டதாக தெரிவிக்கப்பட்டது. ஆனால் அங்கும் 14 பேரை காணவில்லை.

3 மாநிலங்கள் சம்பந்தப்பட்டுள்ளன

ஜபருல்லாவும் அங்கிருந்து தப்பிச் சென்றதாக விசாரணையில் தெரிவிக்கப்பட்டுள்ளது. ஆசிரமத்தில் தங்கியிருந்தவர்களின் மரணம் தொடர்பாக முறையான ஆவணங்கள் இல்லை. கர்நாடகா, ராஜஸ்தான், தமிழ்நாடு என 3 மாநிலங்கள் இந்த வழக்கில் சம்பந்தப்பட்டு உள்ளதால், அன்புஜோதி ஆசிரம வழக்கை சிபிஐக்கு மாற்ற வேண்டும்" என வலியுறுத்தியுள்ளார்.

Published On February 18, 2023