காவிரியில் நீர் இல்லையா? பொங்கிய அர்ஜூன் சம்பத்.. தமிழகத்தில் இன்று இந்து மக்கள் கட்சி ஆர்ப்பாட்டம்

சென்னை: தமிழகம்-கர்நாடகா இடையே காவிரி பிரச்சனை பெரிய அளவில் வெடித்துள்ளது. இந்நிலையில் தான் காவிரியில் தண்ணீர் தர மறுக்கும் கர்நாடகா அரசை கண்டித்து இன்று அர்ஜூன் சம்பத்தின் இந்து மக்கள் கட்சி சார்பில் தமிழகம் முழுவதும் ஆர்ப்பாட்டம் நடத்தப்பட உள்ளது.

தமிழ்நாடு-கர்நாடகா இடையே மீண்டும் காவிரி பிரச்சனை ஏற்பட்டுள்ளது. கர்நாடகா அணைகளில் இருந்து அம்மாநில அரசு உச்சநீதிமன்ற இறுதி தீர்ப்பு மற்றும் காவிரி நடுவர் மன்றம் வழங்கிய தீர்ப்பின்படி தமிழகத்துக்கு மாதந்தோறும் தண்ணீர் திறக்க வேண்டும்.

ஆனால் கர்நாடகா அரசு சரியாக தண்ணீர் திறப்பது இல்லை. இந்த ஆண்டும் கூட தமிழகத்துக்கு திறக்க வேண்டிய உரிய நீரை கர்நாடகா அரசு தரவில்லை. குறைந்த அளவில் மட்டுமே தண்ணீரை திறந்து வருகிறது. கேட்டால் கர்நாடகாவில் மழை இல்லை. கர்நாடகா அணைகளில் நீர் இல்லை என கூறுகிறது.

இருப்பினும் கூட காவிரி நீர் மேலாண்மை ஆணையத்தின் உத்தரவுப்படி கர்நாடகா அரசு 3 ஆயிரம் கனஅடி தண்ணீரை திறந்து வருகிறது. இதற்கிடையே தான் காவிரியில் தமிழகத்துக்கு தண்ணீர் திறக்க கூடாது என கர்நாடகாவில் தொடர்ந்து பந்த் போராட்டம், கர்நாடகா-தமிழக எல்லை முற்றுகை, கேஆர்எஸ் அணை முற்றுகை போராட்டங்களை கன்னட அமைப்பினரும், விவசாய சங்கத்தினரும் நடத்தினர்.

அதேபோல் தமிழகத்துக்கு தேவையான தண்ணீரை திறந்து விடக்கோரி தமிழகத்தில் டெல்டா மாவட்டத்தில் முழு அடைப்பு போராட்டம் நடத்தப்பட்டது. அதேபோல் பல அமைப்பினர் கர்நாடக அரசுக்கு எதிராக போராட்டங்கள் நடத்தி வருகின்றனர். தேமுதிக உள்ளிட்ட கட்சிகளும் போராட்டத்தை நடத்தி உள்ளன. அந்த வரிசையில் தான் இந்து மக்கள் கட்சி சார்பில் தமிழகத்தில் ஆர்ப்பாட்டம் நடத்தப்படும் என அறிவிக்கப்பட்டது.

அதன்படி காவிரியில் தண்ணீர் தர மறுக்கும் கர்நாடகா அரசை கண்டித்தும், தண்ணீர் தராமல் இருக்கும் கர்நாடகா அரசை கண்டிக்காமல் இருக்கும் தமிழக அரசை கண்டித்தும் இந்து மக்கள் கட்சி சார்பில் இன்று மாநிலம் முழுவதும் அறப்போராட்டம் என்ற வகையில் ஆர்ப்பாட்டம் நடத்தப்பட உள்ளது. இதில் இந்து மக்கள் கட்சியை சேர்ந்தவர்கள் பங்கேற்க உள்ளனர்.

முன்னதாக காவிரி விவகாரம் தொடர்பாக தமிழக அரசு மற்றும் கர்நாடகா அரசை கண்டித்து பிரசார பாடம் வெளியிடப்பட்டது என்பது குறிப்பிடத்தக்கது.

English summary

The Cauvery issue between Tamil Nadu and Karnataka has erupted on a large scale. In this context, a protest is being held across Tamil Nadu on behalf of Arjun Sambha's Hindu People's Party today to condemn the Karnataka government for refusing to provide water to Cauvery.