ஆளுநர் பதவி வகிக்கவே தகுதியற்றவர்.. இனி நீங்களே முடிவெடுங்க! முதல்வர் கடிதத்தின் 8 முக்கிய பாயிண்ட்!

சென்னை: ஆளுநர் ஆர்.என்.ரவியின் செயல்பாடுகள் தொடர்பாக குடியரசுத் தலைவருக்கு 19 பக்க புகார் கடிதம் எழுதியுள்ளார் முதலமைச்சர் மு.க.ஸ்டாலின். அதில், வகுப்புவாத வெறுப்பை தூண்டிவிட்டு மாநிலத்தின் அமைதிக்கு அச்சுறுத்தலாக இருக்கிறார் ஆளுநர் ரவி என்பது உள்ளிட்ட கடுமையான குற்றச்சாட்டுகளை முன்வைத்துள்ளார் முதல்வர் ஸ்டாலின்.

முதல்வர் ஸ்டாலின் தலைமையிலான திமுக அரசுக்கும், தமிழ்நாடு ஆளுநர் ஆர்.என்.ரவிக்கும் இடையிலான மோதல் தொடர்ந்து கொண்டிருக்கிறது. திராவிட மாடலை விமர்சிப்பதில் தொடங்கி, அமைச்சர் செந்தில் பாலாஜியை வரம்பு மீறி அமைச்சரவையில் இருந்து நீக்கியது வரை இரு தரப்புக்கும் இடையேயான மோதல் லிஸ்ட் நீண்டு கொண்டே செல்கிறது. இந்நிலையில் தான் ஆளுநர் மீதான குற்றச்சாட்டுகளை அடுக்கி, அவர் ஆளுநராக இருப்பதற்கே தகுதியற்றவர் எனக் கூறி ஜனாதிபதிக்கு கடிதம் எழுதியுள்ளார் முதல்வர் ஸ்டாலின்.

தமிழ்நாடு முதல்வர் ஸ்டாலின், குடியரசுத் தலைவர் திரௌபதி முர்முவுக்கு எழுதியுள்ள கடிதத்தில் இடம்பெற்றுள்ள முக்கியமான 8 அம்சங்கள் என்னென்ன என்று இங்கே பார்க்கலாம்...

1. மாநிலத்தின் நிர்வாக அதிகாரம் ஆளுநரிடம் உள்ளதாக இந்திய அரசியலமைப்புச் சட்டம் கூறுகிறது. இருப்பினும், பெயரளவில் மாநிலத்தின் தலைவரான ஆளுநர், தனது அதிகாரத்தை மாநில முதலமைச்சர் தலைமையிலான அமைச்சரவைக் குழுவின் ஆலோசனை மற்றும் அறிவுரைப்படியே பயன்படுத்த வேண்டும். அரசியல் சாசனத்தின் மீது ஆளுநருக்கு முழு நம்பிக்கை இருக்க வேண்டும். இந்தியா ஒரு இறையாண்மை மிக்க, சோசலிச, மதச்சார்பற்ற, ஜனநாயக குடியரசு நாடு , இந்த அடிப்படைக் கொள்கைகளில் ஏதேனும் ஒன்றில் நம்பிக்கை இல்லாத ஆளுநர், அரசியலமைப்பு பதவியை வகிக்கத் தகுதியற்றவர்.

2. அரசியல்வாதியாக மாறும் ஒரு ஆளுநர், அப்பதவியில் தொடரவே கூடாது. மக்களால் தேர்ந்தெடுக்கப்பட்ட மாநில அரசின் கொள்கை, செயல்பாடுகள், முடிவுகளுக்கு சவால் விடும் வகையில் ஆளுநர் அரசியல் களத்தில் இறங்க வேண்டும் என்பது அரசியல் சாசனத்தின் நோக்கமல்ல.

3. ஆளுநர் சட்டமன்றம் நிறைவேற்றும் சட்டமுன்வடிவுகளுக்கு ஒப்புதல் வழங்குவதில் தேவையற்ற காலதாமதம் செய்து முட்டுக்கட்டை போடுவது அல்லது கூட்டாட்சி மற்றும் மதச்சார்பின்மை போன்ற அரசியலமைப்பின் அடிப்படை அம்சங்களுக்கு எதிராகச் செயல்படுவது போன்றதொரு சூழ்நிலையை அரசியலமைப்பை உருவாக்கியவர்கள் ஒருபோதும் கற்பனை செய்திருக்க மாட்டார்கள். ஆனால், அப்படித்தான் ஆளுநர் ரவி செயல்பட்டு வருகிறார்.

4. தமிழ்நாடு ஆளுநர் ஆர்.என்.ரவி வெளிப்படையாகத் தமிழ்நாடு அரசின் கொள்கைகளுக்கு முரணாகச் செயல்பட்டு, தமிழ்நாடு அரசும், சட்டமன்றமும் செய்து வரும் பணிகளுக்கு முட்டுக்கட்டை போட்டு வருகிறார். சட்ட முன்வடிவுகள் மற்றும் கோப்புகளுக்கு ஒப்புதல் அளிப்பதில் தேவையில்லாமல் காலதாமதம் செய்து வருகிறார்.

5. இதற்கு முன்பு நாகாலாந்து கவர்னராக ஆர்.என். ரவி பொறுப்பு வகித்தபோதும் அவரது செயல்பாடுகள் திருப்திகரமாக அமையவில்லை. உண்மையில் நாகாலாந்து ஆளுநர் பதவியில் இருந்து அவர் நீக்கப்பட்ட பிறகுதான் நாகாலாந்திற்கு ஒரு நிம்மதி ஏற்பட்டுள்ளதாக, நாகாலாந்து தேசியவாத ஜனநாயக முற்போக்குக் கட்சியின் (என்.டி.பி.பி) தலைவர் குறிப்பிட்டுள்ளார்.

6. அரசியல் சாசனத்தையும், சட்டத்தையும் பாதுகாப்பதற்கும், தமிழ்நாட்டு மக்களின் சேவைக்கும், நல்வாழ்விற்கும் தன்னை அர்ப்பணித்துக் கொள்வதற்கும், 159-ஆவது பிரிவின்கீழ் எடுத்த உறுதிமொழியை ஆளுநர் ஆர்.என்.ரவி மீறியுள்ளார் என்பது தெளிவாகிறது என்றும், அவர் வகுப்புவாத வெறுப்பைத் தூண்டிவிட்டு, மாநிலத்தின் அமைதிக்கு அச்சுறுத்தலாக இருக்கிறார்.

7. அ.தி.மு.க முன்னாள் அமைச்சர்கள் மீது வழக்கு தொடர சி.பி.ஐ வேண்டுகோள் விடுத்தும், அதற்கு அனுமதி தராமல் காலம் தாழ்த்திவரும் தமிழ்நாடு ஆளுநர் ஆர்.என். ரவி, மறுபுறம் எனது அமைச்சர் ஒருவர் மீது வழக்கு விசாரணை தற்போதுதான் தொடங்கியுள்ள நிலையில், அவரை "டிஸ்மிஸ்" செய்ய அவசர கதியில் செயல்படுவதன் மூலம் தனது அரசியல் சார்புகளை வெளிப்படுத்தியுள்ளார்.

8. ஆர்.என். ரவி தனது நடத்தை மற்றும் செயல்பாடுகள் மூலம், தான் ஒருதலைப்பட்சமானவர் மற்றும் ஆளுநர் பதவியை வகிக்க தகுதியற்றவர் என்பதை நிரூபித்துள்ளார். எனவே அவர் உயர் பதவியில் இருந்து நீக்கப்படுவதற்கு தகுதியானவர். ஆளுநராக ஆர்.என். ரவி நீடிப்பது பொருத்தமானதா என்பதை இந்தியக் குடியரசுத் தலைவரின் முடிவுக்கே விட்டுவிடுகிறேன்.

English summary

TN Chief Minister MK Stalin has written a complaint letter to the President regarding the activities of Governor RN Ravi. In it, Chief Minister Stalin has made serious allegations, including that Governor Ravi is a threat to the peace of the state by inciting communal hatred.