தீபாவளிக்கு பட்டாசு வெடிக்கிறீங்களா.. சென்னைவாசிகளே.. மேயர் பிரியா சொன்னதை நோட் பண்ணுங்க

சென்னை: தீபாவளி பண்டிகை நாட்களில் பட்டாசு வெடிப்பவர்கள் அந்த கழிவு குப்பைகளை தனியே சேகரித்து தூய்மை பணியாளர்களிடம் வழங்க வேண்டும் என்று சென்னை மேயர் பிரியா தெரிவித்துள்ளார்.

தீபாவளி பண்டிகை ஞாயிற்றுக்கிழமை கொண்டாடப்பட உள்ளது. சொந்த ஊர் செல்பவர்கள் சென்னையில் இருந்து இன்று முதல் புறப்பட தயாராகி விடுவார்கள். சென்னையில் வசிப்பவர்கள் வழக்கமான உற்சாகத்தோடு பட்டாசுகளை வெடித்து பண்டிகை கொண்டாடுவார்கள்.

தீபாவளி பண்டிகையை முன்னிட்டு, பெருநகர சென்னை மாநகராட்சிக்குட்பட்ட பகுதிகளில் சேகரமாகும் பட்டாசுக் கழிவுகளை தனியாக சேகரித்து அப்புறப்படுத்துதல் மற்றும் தீ விபத்து பாதுகாப்பு நடவடிக்கைகள் குறித்த ஆலோசனைக் கூட்டம் மேயர் பிரியா ராஜன் தலைமையில் நேற்று ரிப்பன் கட்டட அலுவலகத்தில் நடைபெற்றது.

இக்கூட்டத்தில் துணை மேயர் மகேஷ்குமார், மாநகராட்சி ஆணையாளர் ராதாகிருஷ்ணன் உள்ளிட்ட அரசு அலுவலர்கள் பலரும் கலந்து கொண்டனர்.
இந்த கூட்டத்தில் பேசிய மேயர் பிரியா ராஜன், "தீபாவளிப் பண்டிகையை முன்னிட்டு சென்னை மாநகராட்சிக்குட்பட்ட பகுதிகளில் சேகரமாகும் பட்டாசுக் கழிவுகளை தனியாக அதற்காக வைக்கப்பட்டுள்ள பைகளில் சேகரித்து, முறையாக பதப்படுத்தும் நிலையங்களுக்கு கொண்டு செல்ல வேண்டும்.

இதற்காக ஒவ்வொரு மண்டலத்திற்கும் கனரக வாகனங்களை இப்பணிகளுக்காக ஒதுக்கி பணிகளை மேற்கொள்ள வேண்டும். தினந்தோறும் சேகரமாகும் பட்டாசுக் கழிவுகள் அன்றைய தினமே சாலை மற்றும் தெருக்களில் இருந்து அப்புறப்படுத்தி, பதப்படுத்தும் நிலையங்களுக்கு கொண்டு செல்ல வேண்டும். அதன் பின்னர் இந்தக் கழிவுகள் முறையாக கும்மிடிப்பூண்டியில் உள்ள நிலையத்திற்கு அனுப்பி வைக்க வேண்டும் என்று கூறினார்.

குப்பை கொட்டும் வளாகங்களில் தீ விபத்து ஏற்படாமல் தடுத்திட தீயணைப்புத் துறையின் மூலம் தகுந்த பாதுகாப்பு வாகனங்களை தயார் நிலையில் வைத்து உரிய பாதுகாப்பு ஏற்பாடுகளை செய்திட வேண்டும். பொதுமக்கள் தீபாவளிப் பண்டிகையை முன்னிட்டு, அரசின் வழிகாட்டுதலின்படி குறிப்பிட்ட நேரத்தில் தகுந்த பாதுகாப்புடன் பட்டாசுகளை வெடித்திட வேண்டும். பட்டாசுக் கழிவுகளை தனியே சேகரித்து, அதனை தூய்மைப் பணியாளர்களிடம் வழங்கி மாநகராட்சிக்கு ஒத்துழைப்பு வழங்க வேண்டும் என்றும் சென்னை மேயர் பிரியா கேட்டுக்கொண்டுள்ளார்.

English summary

Chennai Mayor Priya has said that those who burst firecrackers on Diwali festival days should collect the garbage separately and give it to the sanitation workers.