“மக்களை துன்பப்படுத்திய நரகாசுரனை திருமால் அழித்த நாள்..” எடப்பாடி பழனிசாமி தீபாவளி வாழ்த்து

சென்னை: தித்திக்கும் தீபாவளித் திருநாளில், துன்பங்கள் நீங்கி இன்பங்கள் மலர, மக்கள் அனைவரது வாழ்விலும் இன்பம் பெருகிட, மக்கள் அனைவரும் எல்லா நலமும், வளமும் பெற்று இன்புற்று வாழ்ந்திட வேண்டும் என அதிமுக பொதுச்செயலாளர் எடப்பாடி பழனிசாமி வாழ்த்து தெரிவித்து உள்ளார்.

இந்து மக்களின் முக்கிய பண்டிகையான தீபாவளி நாடு முழுவதும் இன்று கோலாகளமாக கொண்டாடப்பட்டு வருகிறது. பட்டாசுகளை வெடித்து தீபாவளி பண்டிகையை வெகு விமரிசையாக மக்கள் கொண்டாடி வருகிறார்கள். வெளியூர், வெளிமாநிலங்களில் இருந்து தீபாவளியை கொண்டாட தமிழ் மக்கள் சொந்த ஊர்களுக்கு சென்றுள்ளனர். எண்ணெய் தேய்த்து குளித்து புத்தாடை அணிந்து, பூஜை செய்து அனைவரும் தீபாவளி பண்டிகையை கொண்டாடி வருகிறார்கள்.

இதுகுறித்து அவர் வெளியிட்டு உள்ள வாழ்த்துச் செய்தியில், "மக்கள் கொண்டாடும் பண்டிகைகளில் சிறப்பு மிக்க பண்டிகையாம் தீபாவளித் திருநாளை, நாடு முழுவதும் மகிழ்ச்சியுடன் கொண்டாடி மகிழும் அன்பிற்கினிய மக்கள் அனைவருக்கும் எனது உளங்கனிந்த தீபாவளி நல்வாழ்த்துக்கள் - ஐ அன்போடு தெரிவித்துக்கொள்கிறேன்.

மக்களை பெருந்துன்பத்திற்கு ஆளாக்கிய நரகாசுரன் எனும் அரக்கனை இறைவன் திருமால் அழித்த தினமே தீபாவளி பண்டிகையாக கொண்டாடப்படுகிறது. இந்த நாள், இருள் விலகி ஒளி பிறக்கும் தினமாகவும், தீமைகள் அழிந்து நன்மைகள் சுடர்விட்டு பிரகாசிக்கும் தினமாகவும் மக்களால் கருதப்படுகிறது.

தித்திக்கும் இந்த தீபாவளித் திருநாளில், துன்பங்கள் நீங்கி என்றும் இன்பங்கள் மலர, மக்கள் அனைவரது வாழ்விலும் இன்பம் பெருகிட, மக்கள் அனைவரும் எல்லா நலமும், வளமும் பெற்று இன்புற்று வாழ்ந்திட வேண்டும் என்று மனதார வாழ்த்தி, அனைவருக்கும் புரட்சித் தலைவர் எம்.ஜி.ஆர்., புரட்சித் தலைவி அம்மா ஆகியோரது நல்வழியில், இனிய தீபாவளி நல்வாழ்த்துகளை மீண்டும் ஒருமுறை மகிழ்ச்சியோடு உரித்தாக்கிக்கொள்கிறேன்." என்று குறிப்பிட்டு உள்ளார்.

English summary

AIADMK General Secretary Edappadi Palaniswami has expressed his wishes that all sufferings may end and joys blossom, happiness may increase in the lives of all people, and all people should get all health and prosperity and live happily On the auspicious occasion of Diwali