மகாவிஷ்ணு சர்ச்சை: பள்ளிகளில் ஆன்மீக பேச்சு- அரசியல் சாசனத்தின் 28-வது பிரிவு சொல்வது என்ன தெரியுமா?

சென்னை: தமிழ்நாடு அரசு பள்ளிகளில் மூடநம்பிக்கையை விதைக்கும் வகையில் பேசிய பேச்சாளர் மகாவிஷ்ணு கைது செய்யப்பட்டு சிறையில் அடைக்கப்பட்டுள்ளார். மகாவிஷ்ணு தமது பேச்சுக்ககு எதிர்ப்பு தெரிவித்த ஆசிரியர் சங்கரை மிரட்டும் போது, "அரசு பள்ளியில் ஆன்மீகம் பேசக் கூடாது என யார் சொன்னது?" என கேள்வி எழுப்பி இருந்தார். அரசு பள்ளிகளில் ஆன்மீகம் பேசக் கூடாது என்பது சரியானதுதானா? நமது இந்திய அரசியல் சாசனப் புத்தகத்தில் இது பற்றி என்ன சொல்லப்பட்டுள்ளது? என்பது குறித்த விவாதங்கள் தொடருகின்றன.

ஆன்மீகத்தின் பெயராலானா மோசடிகள் ஏராளம்தான்.. அதிலும் நானே கடவுள். .நானே அனைத்தும் என ஏகப்பட்ட 'நடமாடும் கடவுளர்கள்' இந்த தேசத்தில் உலாவுகின்றனர். நானே சிவன் என பிரசங்கம் செய்து ஏடாகூட சர்ச்சைகளில் சிக்கி பல ஆண்டுகளாக தலைமறைவாகி இருப்பவர் நித்தியானந்தா. இவரது பாணியைப் பின்பற்றி நானே மஹா விஷ்ணு, நானே மஹாகுரு என பிரசங்கம் செய்து வெளிநாடுகளிலும் கிளை பிரப்பியிருப்பவர்தான் மகா விஷ்ணு.

ஆசிரியரை மிரட்டிய மகாவிஷ்ணு: சென்னை அசோக்நகர் அரசு பள்ளியில், பாவம் புண்ணியம், மறுஜென்மம் குறித்து கட்டுக்கதைகளை கட்டவிழ்த்துவிட்டார். அதில் முன் ஜென்மத்தில் பாவம் செய்தவர்கள்தான் மாற்றுத் திறனாளிகள் என அடித்துவிட அப்போது சங்கர் என்ற மாற்றுத் திறனாளி ஆசிரியர் கோபம் கொப்பளிக்க எதிர்ப்பு தெரிவித்தார். அப்போது ஆசிரியர் சங்கரை மிரட்டிய மகாவிஷ்ணு, அரசு பள்ளிகளில் ஆன்மீகம் பேசக்கூடாது என யார் சொன்னது? என எகத்தாளமாக கேள்வி எழுப்பி இருந்தார். இந்த வீடியோ வெளியாகி பெரும் சர்ச்சையாகி தற்போது மகாவிஷ்ணு கைது செய்யப்பட்டு ஜெயிலில் அடைக்கப்பட்டுள்ளார். இன்றும் கூட மகாவிஷ்ணு மீது போலீசில் புகார்கள் கொடுக்கப்பட்டுள்ளன.

என்ன சொல்கிறது அரசியல் சாசனம்? : இது ஒரு புறம் இருக்கட்டும்.. மகாவிஷ்ணு, ஆசிரியர் சங்கரை மிரட்டுகிற போது, பள்ளிகளில் ஆன்மீகம் பேசக் கூடாதா? என கேள்வி எழுப்பி இருந்தார் அல்லவா? அது தொடர்பாக இப்போதும் விவாதம் நடைபெறுகிறது.

கல்வி நிறுவனங்களில் ஆன்மீகம் தொடர்பாக நமது இந்திய அரசியல் சாசனம் என்னதான் சொல்கிறது என்பதைப் பார்ப்போம்.

"இந்திய அரசுக்காக தமிழ்நாடு அரசின் சட்ட (ஆட்சி மொழிப் பிரிவு) துறை 2009-ல்
வெளியிட்ட "இந்திய அரசமைப்பு" புத்தகத்தின் அடிப்படையில் இந்த தரவுகள் எழுதப்படுகின்றன.

இந்திய அரசியல் சாசனத்தின் 28-வது பிரிவுதான் கல்வி நிறுவனங்களில் மதம் சார்ந்த நடவடிக்கைகளை விவரிக்கிறது. அதில் இடம் பெற்றிருப்பதாவது:

1) முழுமையாக அரசு நிதியுடன் செயல்படுகிற கல்வி நிறுவனங்கள் எதிலும் மத போதனைகள் செய்யக் கூடாது (No religious instruction shall be provided in any educational institution wholly maintained out of State funds.)

2) அரசால் நிர்வகிக்கப்படும் கல்வி நிறுவனமானாலும் அறக்கட்டளைகள் அல்லது வாரியங்களால் உருவாக்கப்பட்டிருந்தால் அவற்றுக்கு மேலே சொன்ன பிரிவு பொருந்தாது. (Nothing in clause (1) shall apply to an educational institution which is administered by the State but has been established under any endowment or trust which requires that religious instruction shall be imparted in such institution.)

3) அரசு நிதி உதவி பெறுகிற அல்லது அரசு அங்கீகாரம் பெற்ற கல்வி நிறுவனங்களின் மதம் சார்ந்த நடவடிக்கைகளில் ஒருவர் பங்கேற்க வேண்டும் என்பது அவசியம் இல்லை. இத்தகைய மதம் சார்ந்த நடவடிகைகளில் பங்கேற்க மைனர் (Minor) காப்பாளர்கள் ஒப்புதல் (parents/ guardian) ஒப்புதல் தேவை. (No person attending any educational institution recognised by the State or receiving aid out of State funds shall be required to take part in any religious instruction that may be imparted in such institution or to attend any religious worship that may be conducted in such institution or in any premises attached thereto unless such person or, if such person is a minor, his guardian has given his consent thereto.)

அரசியல் சாசன விரோதமே: இப்படித்தான் இந்திய அரசியல் சாசனத்தின் 28-வது பிரிவு வரையறுத்துள்ளது. அதாவது அரசு மற்றும் அரசு உதவி பெறுகிற கல்வி நிறுவனங்களில் மதம் சார்ந்த நடவடிக்கைகளுக்கு இடமே இல்லை; அரசு கட்டுப்பாட்டில் உள்ள மதம் சார்ந்த அறக்கட்டளைகள், வாரியங்கள் நடத்துகிற் கல்வி நிறுவனங்களுக்கு இது பொருந்தாது; ஆனாலும் அதில் மைனர்கள் பங்கேற்க பெற்றோர் ஒப்புதல் தேவை என்கிறது இந்திய அரசியல் சாசனம். ஆக இந்திய அரசியல் சாசனத்தின் படி மகாவிஷ்ணு சென்னை அரசு பள்ளியில் மதம் சார்ந்த நடவடிக்கைகளை மேற்கொண்ட அரசியல் சாசன விரோதமானது; இந்த அடிப்படையைக் கூட தெரிந்து கொள்ளாமல் அவரை அழைத்த தலைமை ஆசிரியரின் நடவடிக்கையும் அரசியல் சாசனத்துக்கு எதிரானதுதான் என்பது தெள்ளத் தெளிவாகிறது.

English summary

Here is an article on Article 28 on Religious Activities in Educational institutions.