Finance with ஹரிஷ் வழக்கு! யூடியூபர் ஜேசன் சாமுவேலை சுற்றிவளைத்துப் பிடித்த கானத்தூர் போலீஸ்!
சென்னை: சென்னையை உலுக்கிய 'Finance With Harish' நிறுவனர் வி.ஹரீஷின் தற்கொலை வழக்கில் காவல்துறை தனது அதிரடி நடவடிக்கையைத் தொடங்கியுள்ளது. ஹரீஷை தற்கொலைக்குத் தூண்டியதாக எழுந்த புகாரின் பேரில், சர்ச்சைக்குரிய வீடியோக்களை வெளியிட்ட யூடியூபரும், தொழில்முனைவோருமான ஜேசன் சாமுவேலை கானத்தூர் தனிப்படை போலீஸார் பிடித்துள்ளனர்.
அவரைத் தீவிர விசாரணை வளையத்திற்குள் கொண்டு வந்துள்ள போலீஸார், நீதிமன்றத்தில் ஆஜர்படுத்துவதற்கான பணிகளை மேற்கொண்டு வருகின்றனர்.
27 வயதான ஹரீஷ், சென்னை ஈசிஆர் (ECR) பகுதியில் உள்ள தனது வாடகை இல்லத்தில் தற்கொலை செய்து கொண்ட சம்பவம், ஒட்டுமொத்த சமூக வலைதள உலகிலும் பெரும் கொந்தளிப்பை ஏற்படுத்தியிருந்தது.
தீவிரமடைந்த தந்தை வினாயகத்தின் புகார்
ஹரீஷ் மரணமடைந்ததைத் தொடர்ந்து, அவரது தந்தை ஜே.வினாயகம் கானத்தூர் காவல் நிலையத்தில் விரிவான புகார் மனு ஒன்றை அளித்தார். அதில் அவர் தெரிவித்திருந்த விவரங்கள்:
தொடர் அச்சுறுத்தல் மற்றும் மிரட்டல்கள்: ஜேசன் சாமுவேல் தனது மகனின் நற்பெயருக்குக் களங்கம் விளைவிக்கும் வகையிலும், தவறான தகவல்களைப் பரப்பும் வகையிலும் தொடர்ந்து வீடியோக்களைப் பதிவிட்டு வந்தார்.
பக்கங்கள் முடக்கம்: திட்டமிட்டு ஆட்களை ஏவி ஹரீஷின் யூடியூப் மற்றும் இன்ஸ்டாகிராம் பக்கங்களை மாஸ் ரிப்போர்ட் (Mass Reporting) செய்து முடக்கியுள்ளனர். மீண்டும் புதிதாகத் தொடங்கிய பக்கத்தையும் முடக்கினர்.
கடைசி வீடியோ ஆதாரம்: ஹரீஷ் தற்கொலைக்கு முன்பு பதிவுசெய்த உருக்கமான வீடியோவில், தன்னை அச்சுறுத்தியது குறித்தும், ஜெயிலுக்குப் போக வேண்டி வரும் என மிரட்டியது குறித்தும் பேசியுள்ளார்.
இதன் அடிப்படையில், வெறும் இயற்கைக்கு மாறான மரணம் என்ற வழக்கைத் தாண்டி, தற்கொலைக்குத் தூண்டுதல் உள்ளிட்ட தீவிர சட்டப் பிரிவுகளின் கீழ் போலீஸார் விசாரணையைத் தீவிரப்படுத்தினர்.
கானத்தூர் போலீஸாரின் பிடியில் ஜேசன் சாமுவேல்
புகார் பெறப்பட்டதைத் தொடர்ந்து, சைபர் கிரைம் வல்லுநர்களின் உதவியுடன் ஹரீஷ் வெளியிட்ட கடைசி வீடியோ, சமூக வலைதளப் பதிவுகள் மற்றும் வாட்ஸ்அப் உரையாடல்களை போலீஸார் ஆய்வுக்கு உட்படுத்தினர்.
விசாரணையின் அடுத்த கட்டமாக, ஜேசன் சாமுவேலை கானத்தூர் போலீஸார் நேரில் பிடித்து விசாரணை வளையத்திற்குள் கொண்டுவந்துள்ளனர்.
ஹரீஷின் பக்கங்கள் முடக்கப்பட்டதற்குப் பின்னால் சைபர் புல்லியிங் நடந்ததா? விழிப்புணர்வு என்ற பெயரில் தனிநபரை மன உளைச்சலுக்கு ஆளாக்கும் வகையிலான அச்சுறுத்தல்கள் விடுக்கப்பட்டதா? இந்த விவகாரத்தில் வேறு ஏதேனும் ரகசிய நெட்வொர்க் மற்றும் ஆட்கள் பின்னணியில் செயல்பட்டார்களா?
என்பது குறித்து விடிய விடிய அவரிடம் வாக்குமூலம் பெறப்பட்டு வருகிறது. விசாரணை முடிவில் அவரை நீதிமன்றத்தில் ஆஜர்படுத்தி நீதிமன்றக் காவலில் வைக்க போலீஸார் தீவிர ஏற்பாடுகளைச் செய்து வருகின்றனர்.
ஜேசன் சாமுவேலின் முந்தைய வாதம் என்ன?
போலீஸாரிடம் சிக்குவதற்கு முன்பாக, ஜேசன் சாமுவேல் தனது எக்ஸ் தளத்தில் ஒரு நீண்ட விளக்கத்தை வெளியிட்டிருந்தார். அதில்: "நான் ஹரீஷை தற்கொலைக்குத் தூண்டவில்லை. அவரிடம் பங்குச் சந்தை கட்டுப்பாட்டு வாரியமான செபியின் (SEBI RIA) உரிய முதலீட்டு ஆலோசகர் உரிமம் இல்லை என்பதையும், ஆம்ஃபி (AMFI) பதிவை தவறாகக் காட்டி வந்தார் என்பதையுமே பொதுமக்களின் நலன் கருதி சுட்டிக்காட்டினேன். உரிமம் பெற்று வந்து மீண்டும் தொழில் செய்யுமாறுதான் கூறினேன். அவர் இந்த விபரீத முடிவை எடுப்பார் என்று நான் துளியும் எதிர்பார்க்கவில்லை" என்று கூறியிருந்தார்.
எனினும், ஒருவரை ஒழுங்குமுறை அமைப்புகளிடம் புகார் செய்யாமல், பொதுமக்கள் மத்தியில் வன்மமான வார்த்தைகளால் தொடர்ச்சியாக தாக்கி வீடியோ வெளியிட்டதும், அதனால் ஏற்பட்ட கடுமையான சமூக அழுத்தமுமே இந்த மரணத்திற்கு வழிவகுத்ததாக ஹரீஷின் தரப்பு திட்டவட்டமாகக் குற்றம்சாட்டுகிறது.
சமூக வலைதள உலகிற்கு ஒரு எச்சரிக்கை மணி
சமூக வலைதளங்களில் ஒருவரை அம்பலப்படுத்துகிறோம் என்ற பெயரில் நடக்கும் வன்மமான சைபர் தாக்குதல்கள் எந்த அளவிற்கு ஒரு மனிதனின் மனநிலையைச் சிதைக்கும் என்பதற்கு இந்த சம்பவம் கசப்பான உதாரணமாக மாறியுள்ளது.
ஜேசன் சாமுவேல் நீதிமன்றத்தில் ஆஜர்படுத்தப்படும் பட்சத்தில், இந்த வழக்கின் சட்டப் போராட்டமும், விசாரணையும் தமிழ்நாடு சோஷியல் மீடியா கிரியேட்டர்கள் மத்தியில் மிக முக்கியமான திருப்புமுனையாக அமையும் என எதிர்பார்க்கப்படுகிறது.
மன அழுத்தம் அல்லது தற்கொலை எண்ணம் ஏற்பட்டால் தயங்காமல் உதவி பெறுங்கள்: சினேகா தற்கொலை தடுப்பு உதவி மையம் - 044-24640050; மத்திய அரசின் டெலி-மானாஸ் இலவச உதவி எண் - 14416
Click it and Unblock the Notifications
Sign in with Google
