தமிழகத்தில் சுட்டெரித்த சூரியன்..வீசிய அனல் காற்று..வெப்பம் தணிக்க 5 நாட்களுக்கு பெய்யப்போகும் மழை

சென்னை: தமிழ்நாட்டில் பல மாவட்டங்களில் அனல் காற்று வீசி வரும் நிலையில் வெப்பத்தை தணிக்க 5 நாட்களுக்கு மழை பெய்ய வாய்ப்பு உள்ளதாக சென்னை வானிலை ஆய்வு மையம் அறிவித்துள்ளது. கரூர் பரமத்தியில் அதிகபட்சமாக 41 டிகிரி செல்சியஸ் வெப்பநிலை பதிவான நிலையில் மேலும் 2 டிகிரி முதல் 4 டிகிரி செல்சியஸ் வரை வெப்பநிலை அதிகரிக்க வாய்ப்பு உள்ளதாக சென்னை வானிலை ஆய்வு மையம் அறிவித்துள்ளது.

அக்னி நட்சத்திரம் போல வெயில் சுட்டெரித்து வருகிறது. கண்ணுக்கு எட்டிய தூரம் வரை சாலைகளில் கானல் நீர் ஓடுகளில் மேகக்கூட்டங்களையே காணோம். வருணபகவான் மனது வைத்து மழையை பொழிவாரா என மக்களின் மனது ஏங்க ஆரம்பித்து விட்டது.

பத்துக்கும் மேற்பட்ட மாவட்டங்களில் 100 டிகிரி பாரன்ஹீட் அதாவது 39 டிகிரி செல்சியஸ் வெப்பநிலை பதிவாகியுள்ளது. அதிகபட்சமாக கரூர் பரமத்தியில் 41 டிகிரி செல்சியஸ் பதிவாகியுள்ளது. மதுரையில் 102 டிகிரி வெப்பநிலை பதிவாகியுள்ளது.

சென்னையில் சராசரியை விட 4 டிகிரி செல்சியஸ் வெப்பநிலை அதிகமாக பதிவாகியுள்ளது. கன்னியாகுமரி மாவட்டத்தில் 2 முதல் 4 டிகிரி செல்சியஸ் வரை அதிகமாக பதிவாகியுள்ளது. கரூர், ராமநாதபுரம், நீலகிரி, மற்றும் மதுரை மாவட்டங்களில் 3 முதல் 5 டிகிரி செல்சியஸ் வெப்பநிலை பதிவாகியுள்ளது.

சென்னை, கோவை, நீலகிரி, மதுரை,திருநெல்வேலி, சேலம், திருப்பத்தூர், மற்றும் ஈரோடு மாவட்டங்களில் 1 முதல் 3 டிகிரி செல்சியஸ் வெப்பநிலை அதிகமாக பதிவாகியுள்ளது.

வானிலை ஆய்வு மையம் இன்று வெளியிட்டுள்ள அறிவிப்பில், தென் இந்தியா பகுதிகளில் மேல் வளி மண்டலத்தின் கீழடுக்குகளில் கிழக்கு திசை காற்றும் மேற்கு திசை காற்றும் சந்திக்கும் பகுதி நிலவுகிறது. இதன் காரணமாக இன்றும் நாளையும் தென் தமிழகம் மற்றும் வட தமிழக உள் மாவட்டங்களில் ஓரிரு இடங்களில் லேசானது முதல் மிதமான மழை பெய்யக்கூடும்.

22 முதல் 24ஆம் தேதி வரைக்கும் தமிழ்நாடு, புதுச்சேரி, காரைக்கால் பகுதிகளில் இடி மின்னலுடன் கூடிய லேசானது முதல் மிதமான மழை பெய்ய வாய்ப்பு உள்ளது. தமிழ்நாடு புதுச்சேரியில் இன்றும் நாளையும் அதிகபட்ச வெப்பநிலை இயல்பில் இருந்து 2 முதல் 4 டிகிரி செல்சியஸ் அதிகரிக்கக் கூடும்.

சென்னை மற்றும் புறநகர் பகுதிகளில் வானம் ஓரளவு மேக மூட்டத்துடன் காணப்படும். அதிகபட்ச வெப்பநிலை 37 முதல் 38 டிகிரி செல்சியஸ் ஆக இருக்கக் கூடும். குறைந்தபட்ச வெப்பநிலை 27 முதல் 28 டிகிரி செல்சியஸ் ஆக இருக்கக்கூடும் என வானிலை ஆய்வு மையம் வெளியிட்டுள்ள அறிவிப்பில் தெரிவிக்கப்பட்டுள்ளது.

English summary

The Chennai Meteorological Department has announced that there is a possibility of rain for 5 days to cool down the heat while hot winds are blowing in many districts of Tamil Nadu. Karur Paramathi has recorded a maximum temperature of 41 degrees Celsius and the Chennai Meteorological Department has announced that there is a possibility of further increase in temperature by 2 degrees to 4 degrees Celsius.