ரேஷன் பொருட்களை வீட்டிற்கே டோர் டெலிவரி பெறுவது எப்படி? தாயுமானவர் திட்டம் எப்படி செயல்படும்?

சென்னை: தமிழ்நாட்டில் முதியோர் மற்றும் மாற்றுத்திறனாளி ரேஷன் அட்டைதாரர்களுக்கு இல்லங்களுக்கே நேரில் சென்று குடிமைப் பொருள் வழங்கும் தாயுமானவர் திட்டத்தை தமிழக முதலமைச்சர் மு.க.ஸ்டாலின் இன்று துவக்கி வைத்தார்.

தமிழ்நாட்டிலுள்ள வயது முதிர்ந்தோர் மற்றும் மாற்றுத்திறனாளி குடும்ப அட்டைதாரர்களின் இல்லத்திற்கே சென்று அரிசி, சர்க்கரை உள்ளிட்ட ரேசன் பொருட்களை விநியோகம் செய்யும் "முதலமைச்சரின் தாயுமானவர் திட்டத்தை" பயனாளிகளுக்கு ரேசன் பொருட்களை வழங்கி தொடங்கி வைத்து, தாயுமானவர் திட்ட வாகனங்களின் சேவைகளையும் கொடியசைத்து தொடங்கி வைத்தார்.

கோவையில் ரேஷன் கடைகளில் தாயுமானவர் திட்டம்

அதனை தொடர்ந்து கோவை மாவட்டத்தில் சாய்பாபா காலனி பகுதியில் இந்த திட்டத்தின் பயனாளிகளுக்கு வீடுகளுக்கே சென்று குடிமை பொருள் வழங்கும் நிகழ்வு நடைபெற்றது. இதில் கோவை மாநகராட்சி ஆணையாளர் சிவகுரு பிரபாகரன், மாவட்ட வருவாய் அலுவலர் ஷர்மிளா, மாநகராட்சி மேயர் மற்றும் துணை மேயர் உட்பட கவுன்சிலர்கள் பலர் கலந்து கொண்டு பயனாளிகளுக்கு குடிமைப் பொருட்களை வழங்கினர்.

இது குறித்து பேட்டி அளித்த கோவை மாவட்ட வருவாய் அலுவலர் சர்மிளா, இந்தத் திட்டத்தின் மூலம் கோவையில் 90 ஆயிரம் பயனாளிகள் பயன்பெறுவார்கள் என்றும் 1205 வாகனங்கள் இதற்காக தயார் செய்யப்பட்டுள்ளதாகவும் 1215 கிளஸ்டர்கள் உருவாக்கப்பட்டுள்ளதாக தெரிவித்தார். இந்த திட்டம் கோவை மாவட்டத்தில் மாதத்தில் இரண்டாவது சனி மற்றும் ஞாயிற்றுக்கிழமைகளில் செயல்படும் என தெரிவித்தார்.

ரேஷன் பொருட்கள் எப்படி வீடு தேடி வரும்?

மாநிலம் முழுவதும் 21.7 லட்சத்திற்கும் அதிகமான முதியவர்கள் மற்றும் மாற்றுத்திறனாளிகளுக்கு ரேஷன் பொருட்களை அவர்களின் இருப்பிடங்களுக்கே கொண்டு சேர்க்கும் நோக்கில், 'தாயுமானவர் திட்டம்' செவ்வாய்க்கிழமை (ஆகஸ்ட் 12, 2025) தொடங்கப்பட்டது. இத்திட்டம் 34,809 நியாயவிலைக் கடைகள் மூலம் செயல்படுத்தப்படும்.

பொது விநியோகத் திட்டத்தின் கீழ், 70 வயதுக்கு மேற்பட்ட 20,42,657 குடிமக்களும், 1,27,797 மாற்றுத்திறனாளிகளும் இத்திட்டத்தால் பயனடைவார்கள். ரேஷன் கடைகளில் இருந்து அத்தியாவசியப் பொருட்கள் ஒவ்வொரு மாதமும் இரண்டாவது சனி மற்றும் ஞாயிற்றுக்கிழமைகளில் பயனாளிகளின் வீடுகளுக்கே நேரடியாக வழங்கப்படும்.

சென்னையின் தண்டையார்பேட்டையில் நடைபெற்ற திட்டத் தொடக்க விழாவில், அமைச்சர் பி.கே. சேகர்பாபு, சட்டமன்ற உறுப்பினர்களான ஜே.ஜே. எபினேசர், ஆர். மூர்த்தி, ஆர்.டி. சேகர், தாயகம் கவி, ஜோசப் சாமுவேல், அ. வெற்றிஅழகன், கே.பி. சங்கர், தலைமைச் செயலாளர் என். முருகானந்தம் மற்றும் உயர் அதிகாரிகள் கலந்துகொண்டனர்.

முதலமைச்சர் மு.க. ஸ்டாலின், "கூட்டுறவுத் துறைக்கு ஏற்படும் ₹30.16 கோடி கூடுதல் செலவை நாங்கள் பொருட்படுத்தவில்லை. மக்களின் வாழ்வைப் பாதுகாக்க சேவை செய்வது எங்கள் கடமை என கருதுகிறோம்," என்று தெரிவித்தார். சமூக வலைத்தளப் பதிவில், 'தாயுமானவர் திட்டம்' தனது விருப்பமான திட்டங்களில் ஒன்று என்றும், இது நாட்டிற்கே ஒரு முன்மாதிரியானது என்றும் ஸ்டாலின் குறிப்பிட்டார். கடந்த நான்கு ஆண்டுகளில் தி.மு.க. அரசு 2,394 ரேஷன் கடைகளைத் திறந்துள்ளதாக அவர் நினைவு கூர்ந்தார்.

ரேஷன் கடைகளில் மாற்றம்

தமிழகம் முழுவதும் தற்போது 37,328 ரேஷன் கடைகள் செயல்படுகின்றன. "தலைவர் கலைஞர் (முன்னாள் முதல்வர் மு. கருணாநிதி) வழியில் நியாயவிலைக் கடைகளை திறம்பட நடத்துவதால்தான் தமிழகத்தில் பசியால் மரணங்கள் இல்லை. ரேஷன் கடைகளைப் பயன்படுத்துவதை மேலும் எளிதாக்க நாங்கள் முயற்சிகள் எடுத்துள்ளோம்," என்று ஸ்டாலின் கூறினார்.

இத்திட்டத்தின் 100% நோக்கத்தை அடைய அதிகாரிகள் மற்றும் கூட்டுறவுத் துறை ஊழியர்கள் உறுதி செய்ய வேண்டும் என்று முதலமைச்சர் வலியுறுத்தினார். "உங்கள் வருகையை ஆவலுடன் எதிர்பார்க்கும் முதியவர்கள் மற்றும் மாற்றுத்திறனாளிகளிடம் நீங்கள் பரிவுடனும், அன்பாகவும் நடந்துகொள்ள வேண்டும்," என்று அவர் அறிவுறுத்தினார்.

புதிய திட்டத்தை அறிவிப்பது மட்டும் போதாது, அதன் பலன்கள் கடைக்கோடி பயனாளியையும் சென்றடைவதை உறுதி செய்வது தங்கள் கடமை என்று அரசு கருதுவதாக ஸ்டாலின் தெரிவித்தார். "முதியவர்கள் எதிர்கொள்ளும் சிரமங்களைப் புரிந்துகொண்ட பின்னரே இந்தத் திட்டத்தை வடிவமைத்துள்ளோம்," என்றும் அவர் மேலும் கூறினார்.

English summary

How to get ration products at your home step with the Thayumanavar scheme door delivery system